ചാരുംമൂട് : ചാരുംമൂട്ടിലെ മൊബൈല്‍ കടയിലെത്തിഅക്രമം നടത്തുകയും തോക്കുചൂണ്ടി ജീവനക്കാരെ ഭീഷണിപ്പെടുത്തുകയും ചെയ്ത സംഭവത്തില്‍ വിമുക്തഭടന്‍ അറസ്റ്റില്‍. പത്തിയൂര്‍, എരുവ പടിഞ്ഞാറ്, കളീക്കല്‍ വീട്ടില്‍ ശിവകുമാര്‍. എസി (47) നെയാണ് നൂറനാട് സിഐയുടെ നേതൃത്വത്തില്‍ അറസ്റ്റ് ചെയ്തത്.ബുധനാഴ്ച വൈകിട്ട് 6.30ഓടെ മൊബൈല്‍ ഫോണ്‍ നന്നാക്കാന്‍ ചാരുംമൂട്ടിലെ കടയില്‍ എത്തിയ ഇയാള്‍ കടയിലെ വനിതാ ജീവനക്കാരിയോട് തര്‍ക്കമുണ്ടാക്കി. അവരെ അസഭ്യം പറഞ്ഞു.
ഇയാളെ തടയാന്‍ ശ്രമിച്ച കടയിലെ മറ്റൊരു സ്റ്റാഫായ വെട്ടിയാര്‍ സ്വദേശിയെ മര്‍ദ്ദിച്ചു. തുടര്‍ന്ന് കടക്കുള്ളില്‍ ഭീകരാന്തരീക്ഷം സൃഷ്ടിച്ച ഇയാള്‍ ബാഗില്‍ നിന്നും പിസ്റ്റല്‍ എടുത്ത് ജീവനക്കാരെ കൊന്നുകളയുമെന്ന് ഭീഷണിപ്പെടുത്തി. കൂടുതല്‍ ആള്‍ക്കാര്‍ കടയിലേക്ക് വന്നതോടെ ഇയാള്‍ കാറില്‍ കയറി കടന്നു കളയുകയായിരുന്നു.ചെങ്ങന്നൂര്‍ഡിവൈഎസ്പി രാജേഷ്. കെ.എന്‍- ന്റെ നിര്‍ദ്ദേശ പ്രകാരം നൂറനാട് പോലീസ് ഇന്‍സ്പക്ടറുടെ നേതൃത്വത്തില്‍ പോലീസ് പ്രതി വന്ന വാഹനം കേന്ദ്രീകരിച്ച് അന്വേഷണം ആരംഭിച്ചു. രാത്രി 11 ഓടെ കായംകുളം രണ്ടാംകുറ്റി ഭാഗത്ത് വച്ച് പ്രതിയെ വാഹനസഹിതം കസ്റ്റഡിയില്‍ എടുത്തു. തുടര്‍ന്ന് നടത്തിയ അന്വേഷണത്തില്‍ പ്രതിയുടെ വീട്ടില്‍ നിന്നും പിസ്റ്റലും വെടിയുണ്ടകളും പിടിച്ചെടുത്തു.
വിമുക്തഭടനായ ഇയാള്‍ സ്വകാര്യ സെക്യൂരിറ്റി സര്‍വീസ് സ്ഥാപനത്തില്‍ ജോലി ചെയ്യുകയാണ്. ജോലി ആവശ്യത്തിനായി ഉപയോഗിക്കുന്ന പിസ്റ്റലിന് ലൈസന്‍സുണ്ട്. ലൈസന്‍സ് രേഖകളും കണ്ടെടുത്തിട്ടുണ്ട്. പ്രതിയെ മാവേലിക്കര ജുഡീഷ്യല്‍ ഒന്നാം ക്ലാസ് മജിസ്ട്രേറ്റ് കോടതി ഹാജരാക്കി. പ്രതിയുടെ ആയുധ ലൈസന്‍സ് റദ്ദു ചെയ്യുന്നതിനുള്ള നടപടികള്‍ ആരംഭിച്ചു. നൂറനാട് പോലീസ് ഇന്‍സ്പെക്ടര്‍ ഷൈജു ഇബ്രാഹിമിനൊപ്പം എസ്ഐ അരുണ്‍കുമാര്‍ പി.എസ്, സീനിയര്‍ സിപിഒമാരായ സിനു വര്‍ഗീസ്, ശരത്.എസ്, പ്രവീണ്‍.പി, കലേഷ്. കെ, രജനി.ആര്‍, എന്നിവര്‍ ചേര്‍ന്ന സംഘമാണ് പ്രതിയെ പിടികൂടിയത്.
പ്രതികരിക്കാൻ ഇവിടെ എഴുതുക: