തിരുവനന്തപുരം: തീരമേഖലയില് വോട്ടിന് പണം നല്കുന്നുവെന്ന ആരോപണത്തിനെതിരെ എന്ഡിഎ സ്ഥാനാര്ത്ഥി രാജീവ് ചന്ദ്രശേഖര് അയച്ച വക്കീല് നോട്ടീസിന് യുഡിഎഫ് സ്ഥാനാര്ത്ഥി ശശി തരൂര് മറുപടി നല്കി. വോട്ടര്മാര്ക്ക് എന്ഡിഎ സ്ഥാനാര്ത്ഥി പണം നല്കി എന്ന് പറഞ്ഞിട്ടില്ല. രാജീവ് ചന്ദ്രശേഖരന്റെ പേരോ പാര്ട്ടിയുടെ പേരോ പരാമര്ശിച്ചിട്ടില്ല. ശശി തരൂര് അയച്ച മറുപടിയില് പറയുന്നത്.
വൈദികരെ ഉള്പ്പടെ സ്വാധീനിക്കാനും വോട്ട് കിട്ടാന് തീരമേഖലയില് പണം നല്കാനും എന്ഡിഎ ശ്രമിക്കുന്നുവെന്ന് ഒരഭിമുഖത്തില് തരൂര് പറഞ്ഞതാണ് പ്രശ്നമായത്.. എന്ഡിഎ തെരഞ്ഞെടുപ്പ് കമ്മീഷനെ സമീപിച്ചു. നിയമനടപടി കര്ശനമാക്കുന്നതിന്റെ ഭാഗമായി വക്കീല് നോട്ടീസും അയച്ചു. പ്രസ്താവന പിന്വലിച്ച് ശശി തരൂര് മാപ്പ് പറയണമെന്നാവശ്യപ്പെട്ടാണ് രാജീവ് ചന്ദ്രശേഖര് വക്കീല് നോട്ടീസ് അയച്ചത്.
ആരാണ് പണം നല്കിയതെന്ന് താന് പറഞ്ഞിട്ടില്ലെന്നും കേട്ടുകേള്വിയാണ് പറഞ്ഞതെന്നും ശശി തരൂര് പറയുന്നു.
ആർക്കും എന്തും പറഞ്ഞു പോകാൻ കഴിയില്ലെന്നും ഒരു ആരോപണം ഉന്നയിക്കുമ്പോൾ അതിന്റെ വസ്തുതകൾ ജനങ്ങളെ ബോധ്യപ്പെടുത്താനുള്ള ആർജ്ജവം കാണിക്കണമെന്നും നേരത്തെ തന്നെ രാജീവ് ചന്ദ്രശേഖർ പ്രതികരിച്ചിരുന്നു. പ്രസ്താവനകൾ നടത്തി ഒരാഴ്ച കഴിഞ്ഞിട്ടും ഈ വിഷയത്തിന്മേൽ ഒന്നും പ്രതികരിക്കാൻ ശശി തരൂർ തയ്യാറാകാത്ത സാഹചര്യത്തിലാണ് രാജീവ് ചന്ദ്രശേഖർ നിയമ നടപടികൾ കടുപ്പിച്ചത്.
തിരുവനന്തപുരത്തെ വോട്ടറന്മാർക്കിടയിൽ തരൂർ തെറ്റായ വിവരങ്ങൾ പ്രചരിപ്പിച്ചുവെന്നും ഇടവക വൈദികർ ഉൾപ്പെടെയുള്ള മണ്ഡലത്തിലെ സ്വാധീനമുള്ള വ്യക്തികൾക്ക് പണം നൽകി വോട്ട് സ്വാധീനിക്കാൻ താൻ ശ്രമിച്ചുവെന്ന തെറ്റിദ്ധരിപ്പിക്കുന്ന വിവരങ്ങൾ ശശി തരൂർ പ്രചരിപ്പിച്ചുവെന്നും രാജീവ് ചന്ദ്രശേഖർ വക്കീൽ നോട്ടീസിൽ പറയുന്നു.
രാജീവ് ചന്ദ്രശേഖറിനെ ദ്രോഹിക്കുക എന്ന ഉദ്ദേശത്തോടെയാണ് തരൂർ ഈ പ്രസ്താവനകൾ നടത്തിയിട്ടുള്ളത്. ഇത്തരം അപകീർത്തികരമായ പ്രസ്താവനകൾ എങ്ങനെയാണ് തിരുവനന്തപുരത്തെ മുഴുവൻ ക്രിസ്ത്യൻ സമൂഹത്തെയും അതിന്റെ നേതാക്കളെയും ദ്രോഹിക്കുകയും അനാദരിക്കുകയും ചെയ്തതെന്നും നോട്ടീസിൽ പറയുന്നു
