ബെംഗളൂരു: അപകടകാരികളായ വിഭാഗത്തിൽ പെടുന്ന നായകളെ നിരോധിച്ച കേന്ദ്ര സർക്കാർ ഉത്തരവ് റദ്ദാക്കി കർണാടക ഹൈക്കോടതി. കഴിഞ്ഞ മാസമാണ് അപകടകാരികളെന്ന് വിലയിരുത്തുന്ന ചില പ്രത്യേക ഇനം നായ്‌ക്കളുടെ ഇറക്കുമതി, പ്രജനനം, വിൽപ്പന എന്നിവ നിരോധിച്ച് കേന്ദ്രസർക്കാർ ഉത്തരവ് ഇറക്കിയത്.
അപകടകരമായ നായ ഇനങ്ങളെ നിരോധിക്കുന്ന സർക്കുലർ പുറപ്പെടുവിക്കുന്നതിന് മുമ്പ് വളർത്തുമൃഗങ്ങളുടെ ഉടമകളോടും ബന്ധപ്പെട്ട സംഘടനകളോടും കൂടിയാലോചിക്കേണ്ടതായിരുന്നുവെന്ന് ഹൈക്കോടതി പറഞ്ഞു. വളർത്തുമൃഗങ്ങൾ ആർക്കെങ്കിലും പരുക്കേൽപ്പിക്കുകയാണെങ്കിൽ അതിന്റെ ഉത്തരവാദിത്തം മൃഗങ്ങളുടെ ഉടമകളാണെന്നും അവർ തന്നെയാണ് ചെലവ് വഹിക്കേണ്ടതെന്നും കോടതി പറഞ്ഞു.
മാർച്ച് 13 നാണ് പിറ്റ് ബുൾ ഉൾപ്പെടെയുള്ള നായ ഇനങ്ങളുടെ വിൽപ്പന, പ്രജനനം, സൂക്ഷിക്കൽ എന്നിവയ്‌ക്ക് ലൈസൻസോ അനുമതിയോ നൽകില്ലെന്ന് കേന്ദ്രം അറിയിച്ചത്. ഇവയ്‌ക്കൽ ലൈസൻസ് നൽകരുതെന്ന് മൃഗസംരക്ഷണ മന്ത്രാലയം സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നൽകിയ സർക്കുലറിൽ ആവശ്യപ്പെട്ടിരുന്നു.
പിറ്റ്ബുൾ ടെറിയർ, ടോസ ഇനു, അമേരിക്കൻ സ്റ്റാഫോർഡ്ഷയർ ടെറിയർ, ഫില ബ്രസീലിറോ, ഡോഗോ അർജൻ്റീനോ, അമേരിക്കൻ ബുൾഡോഗ്, ബോർബോൽ, കംഗൽ, സെൻട്രൽ ഏഷ്യൻ ഷീപ്ഡോഗ്, കൊക്കേഷ്യൻ ഷെപ്പേർഡ് ഡോഗ്, സൗത്ത് റഷ്യൻ ഷെപ്പേർഡ് ഡോഗ്, ജാപ്പനീസ് ഷെപ്പേർഡ് ഡോഗ്, സാർപ് ടോർൺജാക്ക് എന്നിവയ്‌ക്കാണ് നിരോധനം ഏർപ്പെടുത്തിയത്.
ടോസയും അകിതയും, മാസ്റ്റിഫ് (ബോർബോയൽ), റോട്ട്‌വീലർ, ടെറിയേഴ്സ്, റോഡേഷ്യൻ റിഡ്ജ്ബാക്ക്, വുൾഫ് ഡോഗ്സ്, കാനറിയോ, അക്ബാഷ്, മോസ്കോ ഗാർഡ് ഡോഗ്, കെയ്ൻ കോർസോ എന്നിവയും ഇതിൽ ഉൾപ്പെടും.
ഈ ഇനം നായകൾ മനുഷ്യ ജീവന് അപകടകാരികൾ ആണെന്ന വിദഗ്‌ദ്ധ സമിതി റിപ്പോർട്ട് കണക്കിലെടുത്തായിരുന്നു കേന്ദ്രസർക്കാർ ഉത്തരവ് പുറപ്പെടുവിച്ചത്. പട്ടികയിലുള്ള നായകൾ മനുഷ്യജീവന് അപകടമാണെന്നും നായകളുടെ ആക്രമണം മൂലമുള്ള മരണങ്ങൾ വർധിക്കുന്നു എന്നുമുള്ള വിദഗ്‍ദ സമിതി റിപ്പോർട്ടിന്റെ അടിസ്ഥാനത്തിലായിരുന്നു കേന്ദ്ര സർക്കാരിന്റെ നടപടി.
പ്രതികരിക്കാൻ ഇവിടെ എഴുതുക: