ആറ്റിങ്ങല്: ആറ്റിങ്ങല് മണ്ഡലത്തിലെ എന്ഡിഎ സ്ഥാനാര്ത്ഥി വി മുരളീധരന്റെ വാഹന പര്യടനത്തിനു നേരെ ആക്രമണം. ബൈക്കില് എത്തിയ മൂന്നംഗ സംഘമാണ് പര്യടന വാഹന വ്യൂഹത്തില് കടന്നു കയറി ആക്രമണം നടത്തിയത്. സംഭവത്തെ തുടര്ന്ന് അരമണിക്കൂറോളം പര്യടനം വി. മുരളീധരന് നിര്ത്തിവച്ചു. പള്ളിക്കല് പോലീസ് എത്തിയ ശേഷമാണ് പര്യടനം തുടര്ന്നത്.
ആക്രമണത്തിന് നേതൃത്വം നല്കിയത് സിപിഎം മുന് പഞ്ചായത്ത് അംഗത്തിന്റെ മകനാണ് എന്നാണ് ബിജെപി വ്യക്തമാക്കിയത്. പള്ളിക്കല് ഗ്രാമ പഞ്ചായത്തിലെ പകല്ക്കുറി കൊട്ടിയം മുക്കിലാണ് സംഭവം. ഇന്ന് വൈകുന്നേരം ഏഴേകാല് മണിയോടെ ബൈക്കിലെത്തിയ മൂന്നംഗ സംഘം പര്യടനത്തിലെ വാഹന വ്യൂഹത്തില് കടന്നു കയറി അനുഗമിച്ചിരുന്ന സ്ത്രീകള് ഉള്പ്പെടുന്ന ബൈക്ക് യാത്രികരെയും വി. മുരളീധരനെയും അസഭ്യം പറഞ്ഞ് ആക്രമിച്ചത്.
സംഭവം നടന്നതിനെ തുടര്ന്ന് വി. മുരളീധരന് പര്യടനം നിര്ത്തിവെക്കുകയായിരുന്നു.
കേന്ദ്ര മന്ത്രിയുടെ സുരക്ഷാ ഉദ്യോഗസ്ഥനും പോലീസില് വിവരം അറിയിച്ചു. കല്ലറകോണം ജംഗ്ഷനിലും അക്രമ സംഘം സംഘര്ഷത്തിന് ശ്രമം നടത്തി. സിപിഎം കൊടി വീശിയാണ് കല്ലറ കോണത്ത് സംഘര്ഷത്തിന് ശ്രമം നടത്തിയത്. തെരഞ്ഞെടുപ്പ് കമ്മീഷനുമായും ബന്ധപ്പെട്ട് പരാതി നല്കുന്നതിനുള്ള നടപടികള് ആരംഭിച്ചതായി ബിജെപി അറിയിച്ചു. സംഭവത്തിന് പിന്നിലുള്ളവര് പരാജയഭീതിയില് ആക്രമണം അഴിച്ചുവിടാന് ശ്രമിക്കുകയാണെന്നും ബിജെപി പ്രവര്ത്തകര് പൂര്ണ്ണമായും സമാധാനം പാലിക്കണമെന്നും വി. മുരളീധരന് പറഞ്ഞു
