കലവൂര്‍: ഭാര്യയുടെ ഓര്‍മ്മയ്‌ക്കായി രണ്ട് സാധു കുടുംബങ്ങള്‍ക്ക് വീടുകള്‍ നിര്‍മ്മിച്ച് കൈമാറി കാരുണ്യ പ്രവര്‍ത്തകന്‍ മാതൃകയായി. പാതിരപ്പള്ളി കാരുണ്യ ദീപം പ്രേക്ഷിത ഭവനത്തിന്റെ പ്രസിഡന്റ് പി.എല്‍. വര്‍ഗ്ഗീസാണ് തന്റെ ഭാര്യ മേരിക്കുട്ടി വര്‍ഗ്ഗീസിന്റെ ഓര്‍മ്മക്കായി വീടുകള്‍ നിര്‍മ്മിച്ച് നല്‍കിയത്. 15,70,000 രൂപയുടെ നിര്‍മ്മാണ പ്രവര്‍ത്തികളാണ് വര്‍ഗ്ഗീസിന്റെ ആഗ്രഹപ്രകാരം നടത്തിയത്. മാരാരിക്കുളം തെക്ക് പഞ്ചായത്ത് 15-ാം വാര്‍ഡില്‍ ഓമനപ്പുഴ സ്വദേശിയായ ജീന്‍ മേരി, എട്ടാം വാര്‍ഡില്‍ പഴയകാട് സ്വദേശിയായ തുളസിക്കുമാണ് വീടുകള്‍ നല്‍കിയത്.
പാതിരപ്പള്ളി പാടത്ത് വലിയ വീട്ടില്‍ പി.എല്‍ വര്‍ഗ്ഗീസിന്റെ ഭാര്യ രണ്ട് വര്‍ഷം മുന്‍പാണ് മരിച്ചത്. 25 വര്‍ഷമായി ആശുപത്രികളില്‍ സാധുക്കളായ രോഗികളെ സഹായിക്കുന്ന വര്‍ഗ്ഗീസ് 16 വര്‍ഷമായി പാതിരപ്പള്ളിയില്‍ കാരുണ്യദീപം എന്ന ആശ്രയ കേന്ദ്രം നടത്തിവരികയാണ്. ആലപ്പുഴ മംഗലം വാര്‍ഡിലെ സാധു കുടുംബത്തിന്റെ വീട് നിര്‍മ്മാണം പുരോഗമിക്കുകയാണ് അടുത്തമാസം ഇതിന്റെ താക്കോല്‍ കൈമാറ്റം നടക്കും. മാരാരിക്കുളം തെക്ക് ഗ്രാമ പഞ്ചായത്ത് അംഗങ്ങളായ ടി.പി ഷാജി,സര്‍ഗ്ഗം കബീര്‍ ബാഖവി, സിബി ബാസ്റ്റിന്‍ എന്നിവരുടെ നേതൃത്വത്തിലായിരുന്നു വീടുകളുടെ നിര്‍മ്മാണം.കഴിഞ്ഞ ദിവസം നടന്ന ചടങ്ങില്‍ വര്‍ഗ്ഗീസ് കുടുംബമായെത്തിയാണ് ജീന്‍ മേരിക്കും തുളസിക്കും താക്കോല്‍ കൈമാറിയത്. പഞ്ചായത്ത് അംഗങ്ങളും ചടങ്ങില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: