തിരുവനന്തപുരം: ലോക്സഭ തിരഞ്ഞെടുപ്പിനുള്ള നാമനിര്ദ്ദേശ പത്രിക പിന്വലിക്കുന്നതിനുള്ള സമയപരിധി അവസാനിച്ചതോടെ മത്സര രംഗത്ത് 20 മണ്ഡലങ്ങളിലായി 194 സ്ഥാനാര്ത്ഥികള്. 25 പേര് വനിതകളാണ്. ഇന്നലെ മൂന്നുമണി വരെയായിരുന്നു സ്ഥാനാര്ത്ഥിത്വം പിന്വലിക്കുന്നതിനുള്ള സമയപരിധി. 10 സ്ഥാനാര്ത്ഥികള് പത്രിക പിന്വലിച്ചു.
കോട്ടയം മണ്ഡലത്തിലാണ് ഏറ്റവുമധികം സ്ഥാനാര്ത്ഥികളുള്ളത്, 14. അഞ്ച് സ്ഥാനാര്ത്ഥികളുള്ള ആലത്തൂരുരാണ് ഏറ്റവും കുറവ്. കോഴിക്കോട് പതിമൂന്നും കൊല്ലത്തും കണ്ണൂരും 12 വീതവും സ്ഥാനാര്ത്ഥികളുണ്ട്. ഏറ്റവുമധികം വനിതാ സ്ഥാനാര്ത്ഥികളുള്ളത് വടകര മണ്ഡലത്തിലാണ്, നാലു പേര്. കണ്ണൂര്, മലപ്പുറം, തൃശ്ശൂര്, കോട്ടയം, മാവേലിക്കര എന്നീ മണ്ഡലങ്ങളില് സ്ത്രീ സാന്നിധ്യം ഇല്ല. സ്ഥാനാര്ത്ഥികളുടെ അന്തിമ പട്ടികയായപ്പോള് വടകരയില് ഇടത് സ്ഥാനാര്ത്ഥി കെ.കെ. ശൈലജയ്ക്ക് മൂന്ന് അപര സ്ഥാനാര്ത്ഥികളുണ്ട്. യുഡിഎഫ് സ്ഥാനാര്ത്ഥി ഷാഫി പറമ്പിലിനുമുണ്ട് രണ്ട് അപരന്മാരും. കോഴിക്കോട് മണ്ഡലത്തില് എം.കെ. രാഘവനും എളമരം കരീമിനും മൂന്ന് വീതം അപര സ്ഥാനാര്ത്ഥികളുണ്ട്.
തിരുവനന്തപുരം, മാവേലിക്കര, ഇടുക്കി, ചാലക്കുടി, തൃശൂര്, പാലക്കാട്, മലപ്പുറം, വയനാട്, വടകര എന്നിവിടങ്ങളിലാണ് സ്ഥാനാര്ത്ഥികള് പത്രിക പിന്വലിച്ചത്. അന്തിമ സ്ഥാനാര്ഥി പട്ടിക തയാറായതോടെ സ്ഥാനാര്ത്ഥികള്ക്ക് തെരഞ്ഞെടുപ്പ് കമ്മിഷന് ചിഹ്നങ്ങള് അനുവദിച്ചു തുടങ്ങി.
ലോക്സഭ മണ്ഡലം തിരിച്ച് നിലവിലുള്ള സ്ഥാനാര്ത്ഥികളുടെ എണ്ണം: തിരുവനന്തപുരം 12, ആറ്റിങ്ങല് 7, കൊല്ലം 12, പത്തനംതിട്ട 8, മാവേലിക്കര 9, ആലപ്പുഴ 11, കോട്ടയം 14, ഇടുക്കി 7, എറണാകുളം 10, ചാലക്കുടി 11, തൃശ്ശൂര് 9, ആലത്തൂര് 5, പാലക്കാട് 10, പൊന്നാനി 8, മലപ്പുറം 8, വയനാട് 9, കോഴിക്കോട് 13, വടകര 10, കണ്ണൂര് 12, കാസര്കോട് 9.
