മലപ്പുറം: കണ്ണൂരില്‍ സിപിഎം പ്രവര്‍ത്തകന്റെ മരണത്തിനിടയാക്കിയ ബോംബ് സ്‌ഫോടനത്തിന് പിന്നില്‍ പി. ജയരാജനും എം. വി. ജയരാജനും ഇ.പി. ജയരാജനുമാണെന്ന് ബിജെപി ദേശീയ ഉപാദ്ധ്യക്ഷന്‍ എ.പി. അബ്ദുള്ള കുട്ടി. മലപ്പുറത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.
പിണറായി വിജയന്‍ അറിയാതെ കണ്ണൂര്‍ പാര്‍ട്ടിയില്‍ ഒരു കരിയില പോലും അനങ്ങില്ല. സിപിഎമ്മിനകത്ത് നിന്ന് പ്രത്യേകിച്ച് പാര്‍ട്ടി ഗ്രാമങ്ങളില്‍ വമ്പിച്ച അടിയൊഴുക്കാണ്. ബിജെപിയിലേക്ക് അണികള്‍ ചോരുന്നത് തടയാന്‍ ഭീകര അന്തരീക്ഷം സൃഷ്ടിക്കാനുള്ള ശ്രമത്തിന്റെ ഭാഗമായാണ് അനിഷ്ടസംഭവം ഉണ്ടായത്. ജനങ്ങളെ ഭയപ്പെടുത്തി നിര്‍ത്താന്‍ വേണ്ടിയിട്ടാണ് ഈ ബോംബ് നിര്‍മ്മാണം. ഇതില്‍ സിപിഎമ്മിന് പങ്കുണ്ട് എന്നതിന് തെളിവാണ് കെ.പി. മോഹനന്‍ എംഎല്‍എയും, ഏരിയാ നേതാക്കളും ക്രിമിനുകളുടെ വീട് സന്ദര്‍ശിച്ചത്.
സിപിഎമ്മിന്റെ മുതിര്‍ന്ന ഏരിയ കമ്മിറ്റി അംഗം കെ.കെ. സുധീര്‍കുമാറിന്റെ നേതൃത്വത്തില്‍ ഈ ക്രിമിനലുകളുടെ വീടുകളെല്ലാം സന്ദര്‍ശിക്കുകയും അവരുടെ ചികിത്സയും അവരുടെ കേസും പാര്‍ട്ടി നടത്തും എന്നുള്ള വാഗ്ദാനം നല്‍കുകയും ചെയ്തിരിക്കുകയാണ്. പോലീസ് ഉദ്യോഗസ്ഥന്മാര്‍ പറയുന്നത് ഹൈടെക് ബോംബ് ആണ് നിര്‍മ്മിച്ചതെന്നാണ്. ഇതിനാവശ്യമായ വസ്തുക്കള്‍ക്ക് ലക്ഷക്കണക്കിന് രൂപ വരും.
ഇത് പ്രദേശത്ത് 10 സഖാക്കള്‍ വിചാരിച്ചാല്‍ സാധിക്കുന്നതല്ല അത്. അതുപോലെതന്നെ അപകടം ഉണ്ടായ ഉടനെ പരിക്കേറ്റവരെ വലിയ ആശുപത്രിയില്‍ ചികിത്സയ്‌ക്ക് എത്തിച്ചിരിക്കുകയാണ്. സിപിഎമ്മും പിണറായിയും മാസപ്പടി ഉള്‍പ്പെടെയുള്ള അഴിമതിയില്‍പ്പെട്ട് നാണംകെട്ട് നില്‍ക്കുന്നത് മറച്ച് ജനശ്രദ്ധ തിരിച്ചുവിടാനാണ് ശ്രമിക്കുന്നതെന്നും അദ്ദേഹം വ്യക്തമാക്കി.
പ്രതികരിക്കാൻ ഇവിടെ എഴുതുക: