ന്യൂദല്ഹി: 3567 കോടി രൂപ അടയ്ക്കാന് ആവശ്യപ്പെട്ട് ആദായ നികുതി വകുപ്പ് നല്കിയ നോട്ടീസില് കോണ്ഗ്രസിന് താല്ക്കാലിക ആശ്വാസം. ലോക്സഭാ തെരഞ്ഞെടുപ്പ് പരിഗണിച്ച് ജൂണ് രണ്ടാം വാരം വരെ 3,567 കോടി രൂപ തിരിച്ചുപിടിക്കാന് കോണ്ഗ്രസിനെതിരെ നിര്ബന്ധിത നടപടികളൊന്നും സ്വീകരിക്കില്ലെന്ന് ആദായനികുതി വകുപ്പ് കോടതിയെ അറിയിച്ചു.
ആദായനികുതി വകുപ്പിനുവേണ്ടി ഹാജരായ സോളിസിറ്റര് ജനറല് തുഷാര് മേത്തയാണ് ഇക്കാര്യം കോടതിയില് വ്യക്തമാക്കിയത്. തെരഞ്ഞെടുപ്പ് കഴിയുന്നതുവരെ യാതൊരു നടപടിയും ഉണ്ടാവില്ലെന്നും രാഷ്ട്രീയ പാര്ട്ടിയെന്ന പരിഗണനവച്ചാണിതെന്നും തുഷാര് മേത്ത കോടതിയെ അറിയിച്ചു.
വിവിധ അക്കൗണ്ടുകളില് നിന്ന് 135 കോടിരൂപ തിരിച്ചുപിടിച്ച ആദായനികുതി വകുപ്പിനെതിരെ കോണ്ഗ്രസ് നല്കിയ ഹര്ജി ജസ്റ്റിസ് ബി.വി. നാഗരത്ന, ജസ്റ്റിസ് അഗസ്റ്റിന് ജോര്ജ് മസീഹ് എന്നിവരടങ്ങിയ ബെഞ്ച് പരിഗണിക്കുമ്പോഴാണ് എസ്ജി ഇക്കാര്യം അറിയിച്ചത്. 2018- 19 സാമ്പത്തിക വര്ഷത്തെ ആദായ നികുതി റിട്ടേണ് വൈകിയതിനാണ് 103 കോടി പിഴയും പലിശയുമടക്കം 135 കോടി പിടിച്ചെടുത്തത്. വിഷയത്തില് കൂടുതല് കാര്യങ്ങള് പറയാനുണ്ടെന്നും വ്യക്തമാക്കിയ എസ്ജി 3567 കോടി നികുതി കുടിശികയുണ്ടെന്നും കോടതിയെ അറിയിച്ചു. തുടര്ന്ന് കേസ് പരിഗണിക്കുന്നത് ജൂലൈ 24 ലേക്ക് മാറ്റി.
ആദായ നികുതി വകുപ്പില് നിന്ന് മൂന്ന് ദിവസത്തിനിടെ 3567.25 കോടിയുടെ നോട്ടീസാണ് കോണ്ഗ്രസിന് ലഭിച്ചത്. 11 കോടി രൂപ പിഴയടക്കണമെന്നാവശ്യപ്പെട്ട് സിപിഐയ്ക്കും നോട്ടീസയച്ചിരുന്നു. നികുതി റിട്ടേണ് ഫയല് ചെയ്യുന്നതിന് പഴയ പാന്കാര്ഡ് ഉപയോഗിച്ചുവെന്നും ഇതുവഴി 11 കോടി രൂപ സിപിഐ കുടിശ്ശികയാക്കിയെന്നും ചൂണ്ടിക്കാട്ടിയായിരുന്നു നോട്ടീസ്.
