ആലപ്പുഴ: മുഖ്യമന്ത്രി പിണറായി വിജയന്റെ നിയമസഭാ പ്രസംഗം പൊതുഖജനാവില് നിന്ന് കോടികള് ചെലവഴിച്ച് അച്ചടിച്ച് എല്ഡിഎഫുകാര് വീടുകള് കയറിയിറങ്ങി വിതരണം ചെയ്യുന്നു. തെരഞ്ഞെടുപ്പ് കമ്മിഷന് ഇടപെടണമെന്ന് ആവശ്യം ഉയരുന്നു. മുഖ്യമന്ത്രിയുടെ നിയമസഭ പ്രസംഗം പുസ്തക വിതരണം പെരുമാറ്റ ചട്ടങ്ങള്ക്ക് വിരുദ്ധമാണെന്ന് ആക്ഷേപം ഉയരുന്നു. മുഖ്യമന്ത്രിക്കെതിരെ പെരുമാറ്റ ചട്ടലംഘനത്തിന് നടപടി എടുക്കണമെന്നാണ് ആവശ്യം.
മുഖ്യമന്ത്രി പിണറായി വിജയന് നയപ്രഖ്യാപനത്തിനുള്ള നന്ദിപ്രമേയ ചര്ച്ചയ്ക്ക് നല്കിയ മറുപടിയാണ് പിആര്ഡി പുസ്തക രൂപത്തില് ഇറക്കിയിട്ടുള്ളത്. അന്പത് ലക്ഷത്തോളം കോപ്പിയാണ് അച്ചടിച്ചിട്ടുള്ളത്. കെബിപിഎസാണ് പ്രസാധകര്. സര്ക്കാര് കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോഴാണ് പ്രസംഗങ്ങളും വന് തുക മുടക്കി പുസ്തകരൂപത്തില് ഇറക്കിയത്. എല്ഡിഎഫിന്റെ തെരഞ്ഞെടുപ്പ് പ്രചാരണത്തിന് പൊതുപണം വിനിയോഗിക്കുന്നത് നഗ്നമായ ചട്ടലംഘനമാണെന്ന് ചൂണ്ടികാണിക്കപ്പെടുന്നു.
