ഡെറാഡൂണ് : ഡെറാഡൂണില് കൂട്ടബലാത്സംഗത്തിനിരയായ യുവതിയുടെ പരാതിയില് കേസെടുത്ത് പൊലീസ്. മദ്രസയില് പാചക തൊഴിലാളിയായ സ്ത്രീയാണ് ബലാത്സംഗത്തിനിരയായത്. മൂന്നു പേര് ചേര്ന്നാണ് യുവതിയെ കൂട്ട ബലാത്സംഗത്തിനിരയാക്കിയത്. യുവതി നല്കിയ പരാതിയുടെ അടിസ്ഥാനത്തില് സഹസ്പൂര് പൊലീസ് സ്റ്റേഷനില് കേസ് രജിസ്റ്റര് ചെയ്തു.
മദ്രസയിലെ രണ്ട് അധ്യാപകരും മാനേജരും ചേര്ന്ന് മയക്കുമരുന്ന് നല്കി തന്നെ ബോധം കെടുത്തിയ ശേഷം ബലാത്സംഗം ചെയ്യുകയായിരുന്നെന്ന് യുവതി പരാതിയില് പറയുന്നു. ബോധം വന്നതിനു ശേഷം പ്രതിരോധിക്കാന് ശ്രമിച്ച തന്നെ, സംഭവം പുറത്ത് പറഞ്ഞാല് കൊല്ലുമെന്നും പ്രതികള് ഭീഷണിപ്പെടുത്തിയതായും യുവതി പറഞ്ഞു.
സംഭവത്തില് കൂട്ടബലാത്സംഗത്തിന് കേസെടുത്തതായി സഹസ്പൂര് പൊലീസ് സ്റ്റേഷന് ഇന്ചാര്ജ് മുകേഷ് ത്യാഗി പറഞ്ഞു. കേസിന്റെ അന്വേഷണ ചുമതല വനിത എസ് ഐയ്ക്ക് കൈമാറിയതായും പ്രതികളെ കണ്ടെത്താനുള്ള തെരച്ചില് ആരംഭിച്ചുവെന്നും അദ്ദേഹം വ്യക്തമാക്കി.
