ന്യൂദല്ഹി : അരവിന്ദ് കെജരിവാളിന്റെ ഇ ഡി കസ്റ്റഡി ഏപ്രില് 1 വരെ നീട്ടി. കസ്റ്റഡി കാലാവധി ഇന്ന് തീര്ന്ന സാഹചര്യത്തിലാണ് ദല്ഹി റൗസ് അവന്യൂ കോടതിയില് കെജ്രിവാളിനെ ഹാജരാക്കിയത്.
തനിക്ക് കുറച്ച് കാര്യങ്ങള് പറയാനുണ്ടെന്ന് കെജ്രിവാള് കോടതിയെ അറിയിക്കുകയും കോടതി ഇതിന് അനുവാദം നല്കുകയും ചെയ്തു.പറയാനുള്ളത് ആദ്യം എഴുതിനല്കാന് കോടതി ആവശ്യപ്പെട്ടങ്കിലും നേരിട്ട് ബോധിപ്പിക്കണമെന്ന് കെജ്രിവാള് അറിയിച്ചു.
അഭിഭാഷകനെ മറികടന്ന് ഇഡിയോട് കെജ്രിവാള് നേരിട്ട് ചോദ്യങ്ങള് ഉന്നയിച്ചപ്പോള് കെജ്രിവാള് കോടതി മുറിയില് ഷോ നടത്തുകയാണെന്ന് ഇഡിയും കുറ്റപ്പെടുത്തി. മുഖ്യമന്ത്രി ആയതിനാല് അല്ല, അഴിമതി നടത്തിയതിനാലാണ് അറസ്റ്റ് ചെയ്തതെന്നും ഇഡി കോടതിയില് പറഞ്ഞു.
സാക്ഷികളെ ഭീഷണിപ്പെടുത്തിയാണ് ഇഡി നടപടിയെന്ന് കെജ്രിവാള് കോടതിയില് പറഞ്ഞു. നൂറ് കോടിയുടെ അഴിമതിയെങ്കില് പണം എവിടെ എന്നും കെജ്രിവാള് ചോദിച്ചു.
