അടൂര്: അമേരിക്കന് പ്രവാസി മലയാളിയും സംഘടനാ പ്രവര്ത്തകനുമായ ശ്രീകുമാര് ഉണ്ണിത്താന്റെ ‘ നൊമ്പരങ്ങളുടെ പുസ്തകം ‘ സംവിധായകന് അടൂര് ഗോപാലകൃഷ്ണന് പ്രകാശനം ചെയ്തു. ഡപ്യൂട്ടി സ്പീക്കര് ചിറ്റയം ഗോപകുമാര് ആദ്യ പതിപ്പ് ഏറ്റുവാങ്ങി. ഭാര്യ ഉഷയുടെ ഓര്മ്മകള് പങ്കുവെയ്ക്കുന്ന കുറിപ്പുകളുടെ സമാഹാരം ജീവിതാനുഭവങ്ങളുടേയും വേര്പാടിന്റെ ദുഃഖങ്ങളുടേയും ആകെ തുകയാണെന്ന് അടൂര് പറഞ്ഞു. വേദനയെ എഴുത്ത് ഏറ്റെടുത്ത കാഴ്ചയാണ് ഇത്. പ്രവാസ ജീവിതത്തിനിടിലും മലയാളവും എഴുത്തും കൈവിടുന്നില്ല എന്നതാണ് പ്രധാനം. ഇത് ശ്രീകുമാറിന്റെ ആദ്യ പുസ്തകം ആകട്ടെ എന്ന് ആശംസിക്കുന്നു.അതിനര്ത്ഥം ഇനിയും കൂടുതല് എഴുതണമെന്നാണ്. അടുര് പറഞ്ഞു.
ക്യാന്സര് മൂലം അകാലത്തില് പൊലിഞ്ഞ ഭാര്യയുടെ ശുന്യത സൃഷ്ട്രിച്ച നിസ്സഹായത ശ്രീകുമാര് കുറിക്കുമ്പോഴും ‘ നൊമ്പരങ്ങളുടെ പുസ്തകം ‘ ജീവിതത്തെ നേരിടാനുള്ള ആത്മവിശ്വസവും പകരുന്നു’ .അടൂര് ഗോപാലകൃഷ്ണന് പറഞ്ഞു.
.ശ്രീകുമാര് ഉണ്ണിത്താന് എഴുത്തുകാരന് കൂടി ആണെന്ന് അറിയുന്നത് അമേരിക്കയില് എത്തിയപ്പോഴാണെന്ന് ചിറ്റയം ഗോപകുമാര് പറഞ്ഞു. അദ്ദേഹത്തിന്റെ ആതിഥേയത്വം സ്വീകരിച്ച് ന്യൂയോക്കോര്ക്കിലെ വീട്ടില് കഴിയുമ്പോള് ഉഷ ഉണ്ണിത്താന് നല്കിയ കരുതലുകള് മറക്കാനാവില്ല. ഈ പുസ്തകം ഒരു ഓര്മ്മപ്പെടുത്തല് കൂടിയാണ്. ഒരു അനുഭവം കൂടിയാണ്. എങ്ങനെയാണ് നമ്മള് മുന്നോട്ട് പോകേണ്ടത് എന്ന പാഠം നമുക്ക് ലഭിക്കുമെന്നും ചിറ്റയം പറഞ്ഞു.
ശ്രീകുമാര് ഉണ്ണിത്താന് തന്നിലേക്കു തന്നെയുളള സഞ്ചാരമാണ് നടത്തിയിരിക്കുന്നതെന്ന് പുസ്തകത്തെ പരിചയപ്പെടുത്തിക്കൊണ്ട് നിരൂപകന് പ്രദീപ് പനങ്ങാട് പറഞ്ഞു.. ദീര്ഘകാലത്തെ പ്രാവസ ജീവിതമുണ്ടങ്കിലും ഭാഷ ഇപ്പോഴും കൂടെയുണ്ട്. തെളിമയോടെ, വ്യക്തതയോടെ, ഓരോ കുറിപ്പും എഴുതിയിരിക്കുന്നു. മനസ്സില് നൊമ്പരവും കാരുണ്യവും അത് സൃഷ്ടിക്കുന്നു.
ജീവിതത്തിലേക്ക് തിരിച്ചു വരാനും സജീവമാകാനും ഒരു പാട് വഴികളുണ്ട്. അതിലൊന്നാണ് അക്ഷരങ്ങളെ കുട്ടു പിടിച്ച്, അനുഭവങ്ങളെ ആ വീഷ്ക്കരിക്കുക എന്നത്. അതിനിടയിലൂടെ നൊമ്പരങ്ങളും വിഷാദവും ആകാംഷയുമെല്ലാം വാര്ന്നു പോകും.ഉത്സാഹഭരിതരും ജീവിതാസക്തരുമാക്കി മാറ്റും ശ്രീകുമാര് ഉണ്ണിത്താന് ചെയ്യുന്നത് അതാണ്. വിഷാദ കാലത്തു നിന്നും ജീവിതത്തെ തിരിച്ചു പിടിക്കാനുള്ള ആഗ്രഹമാണ് അദ്ദേഹത്തിന്റെ പുസ്തകത്തില് വായിക്കുന്നത്. ശ്രീകുമാറിന് എഴുത്തിലൂടെ ഇനിയും മൂന്നോട്ട് സഞ്ചരിക്കാന് കഴിയും. പനങ്ങാട് പറഞ്ഞു.
മാധ്യമ പ്രവര്ത്തകനും എഴുത്തുകാരനുമായുള്ള ശ്രീകുമാര് ഉണ്ണിത്താന്റെ വളര്ച്ച അടുത്തുനിന്ന് കാണാന് സാധിച്ചതില് അഭിമാനം തോന്നുന്നതായി ‘ജന്മഭൂമി’ ന്യൂസ് എഡിറ്ററും കേരളസര്വകലാശാല സെനറ്റ് അംഗവുമായ പി. ശ്രീകുമാര് പറഞ്ഞു.
കുട്ടിക്കാലം മുതല് സുഹൃത്തായ ശ്രീകുമാര് ഉണ്ണിത്താന്റെ പുസ്തകം നിരവധി ഓര്മ്മകളാണ് സമ്മാനിക്കുന്നതെന്ന് ഡോ. മണക്കാല ഗോപാലകൃഷ്ണന് സൂചിപ്പിച്ചു. ശ്രീകുമാറില് നിന്ന് കൂടുതല് പുസ്തകങ്ങള് ഉണ്ടാകട്ടെ എന്ന് മുന് ദേവസ്വം ബോര്ഡ് അംഗം അഡ്വ. കെ. എസ്. രവി ആശംസിച്ചു.അമേരിക്കയിലെ പ്രവാസി മലയാളികള്ക്കെല്ലാം ഇഷ്ടപ്പെട്ട പി ആര് ഒ ആണ് ശ്രീകുമാര് ഉണ്ണിത്താനെന്ന് ഫൊക്കാന ട്രസ്റ്റി ബോര്ഡ് അംഗവും മുന് ജനറല് സെക്രട്ടറിയുമായ ഡോ. സജിമോന് ആന്റണി പറഞ്ഞു. അധ്യക്ഷം വഹിച്ച സുരേഷ് ബാബൂവും സ്വാഗതമോതിയ വേണുഗോപാലും ശ്രീകുമാറുമായുള്ള വര്ഷങ്ങള് നീണ്ട കൂട്ട് അനുസ്മരിച്ചു.
ബന്ധുക്കളും സുഹൃത്തുക്കളും ഉള്പ്പെടെ നിരവധി പേര് പങ്കെടുത്ത ചടങ്ങില് വൈകാരികമായിരുന്നു ശ്രീകുമാര് ഉണ്ണിത്താന്റെ മറുപടി പ്രസംഗം. ഭാര്യയുടെ അദൃശ്യ സാന്നിധ്യം അനുഭവിച്ചുകൊണ്ടാണ് ഒരോ കുറിപ്പും എഴുതിയതെന്ന് അദ്ദേഹം പറഞ്ഞു
ജോലിയും എഴുത്തും സംഘടനാ പ്രവര്ത്തനവുമായി മുന്നോട്ടു പോകുമ്പോളാണ് അര്ബുദം എന്ന മഹാരോഗം ജീവിതത്തെ മാറ്റി മറിച്ചത്. ഉഷ ജീവിതത്തോട് ധീരമായി പോരാടി. പക്ഷേ പരാജയപ്പെട്ടു. സ്നേഹം എപ്പോഴും പൂത്തുനിന്ന ജീവിതമായിരുന്നു ഞങ്ങളുടേത് ജീവിതാവസാനം വരെ ഒന്നിച്ചു നടക്കാമെന്ന് ആഗ്രഹിച്ചു. പക്ഷേ ജീവിതയാത്രയില് ഒരാള് യാത്രമതിയാക്കി കടന്നുപോയി. വല്ലാതെ തളര്ന്നു പോയ സന്ദര്ഭമാണത് പെട്ടന്ന് വല്ലാത്തൊരു ഒറ്റപ്പടല്. മുന്നില് ഇരുട്ട് അതില്നിന്നുള്ള അതിജീവനം ആവശ്യമായിരുന്നു. കാലത്തിനൊപ്പം യാത്ര ചെയ്യേണ്ടിയിരുന്നു. ജീവിതത്തെ തിരിച്ചു പിടിക്കണമായിരുന്നു. ആ സന്ദര്ഭത്തിലാണ് ഈ കുറിപ്പുകകള് എഴുതുന്നത് . ശ്രീകുമാര് പറഞ്ഞു. ഓര്മ്മകളുടെ തീരത്തുകൂടിയാണ് ഇപ്പോള് സഞ്ചരിക്കുന്നത്. സ്നേഹത്തിന്റെ നിലാവ് ഇപ്പോഴും കൂടെയുണ്ട്. ഒരോ കുറിപ്പ് എഴുതുമ്പോഴും ആ സാന്നിധ്യം ഞാന് തിരിച്ചറിഞ്ഞിരുന്നു. ശ്രീകുമാര് ഉണ്ണിത്താന് പറഞ്ഞു.
