നീലേശ്വരം (കാസർകോട്): സ്വന്തം പറമ്പിൽനിന്ന് തേങ്ങ പറിച്ചെടുക്കുന്നതിന് വയോധികയ്ക്ക് വിലക്ക്. നീലേശ്വരം പാലായിയിലെ എം.കെ. രാധയ്ക്കാണ് (70) സിപിഎം പ്രവർത്തകർ വിലക്കേർപ്പെടുത്തിയത്. ശനിയാഴ്ച പടന്നക്കാട്ടെ തെങ്ങുകയറ്റ തൊഴിലാളിയെത്തി തെങ്ങിൽ കയറുന്നതിനിടെയാണ് പ്രാദേശിക സിപിഎം നേതാക്കൾ സ്ഥലത്തെത്തി അസഭ്യം പറയുകയും കത്തി കാട്ടി ഭീഷണിപ്പെടുത്തുകയും ചെയ്തത്.
പിണറായിയാണ് നാട് ഭരിക്കുന്നതെന്ന ഓർമ്മ വേണമെന്ന് പറഞ്ഞായിരുന്നു നേതാക്കളുടെ ഭീഷണി. തേങ്ങയിടാൻ വന്ന തെങ്ങുകയറ്റ തൊഴിലാളിയെ ഇവർ മർദ്ദിക്കുന്നതുൾപ്പടെയുള്ള ദൃശ്യങ്ങൾ പുറത്തു വന്നു. രാധ, രാധയുടെ മകൾ ബീന, ഇവരുടെ പേരക്കുട്ടി എന്നിവർക്ക് നേരെയായിരുന്നു സിപിഎമ്മിന്റെ അസഭ്യപ്രയോഗം. എട്ട് വർഷത്തോളമായി തങ്ങളുടെ സ്വന്തം സ്ഥലത്ത് സിപിഎമ്മിന്റെ ഊരുവിലക്കാണെന്ന് ബീന പറഞ്ഞു. അതുകൊണ്ട് പ്രദേശത്തെ തെങ്ങുകയറ്റ തൊഴിലാളിയെ വിളിച്ചാൽ അവർ വരില്ല. ഇതേ തുടർന്ന് മറ്റൊരു സ്ഥലത്ത് നിന്നും വിളിച്ചു വരുത്തിയ തൊഴിലാളിയെയാണ് നേതാക്കൾ മർദ്ദിച്ചതെന്നും ബീന പറഞ്ഞു.
സംഭവവുമായി ബന്ധപ്പെട്ട് ആറ് സിപിഎം പ്രവർത്തകരുൾപ്പെടെ ഏഴുപേർക്കെതിരേ രാധ കാഞ്ഞങ്ങാട് ഡിവൈ.എസ്.പി.ക്ക് പരാതി നൽകി. പാലായി റഗുലേറ്റർ കം ബ്രിഡ്ജ് നിർമാണവുമായി ബന്ധപ്പെട്ട് 2016 മുതൽ പ്രദേശത്ത് പ്രശ്നം നിലവിലുണ്ട്. റോഡ് നിർമാണത്തിൽ സ്ഥലം വിട്ടുനൽകാത്തതാണ് പ്രശ്നത്തിന് കാരണം. ഇതുമായി ബന്ധപ്പെട്ട് കേസുകളുമുണ്ട്.
അതേസമയം പ്രചാരണം വസ്തുതാ വിരുദ്ധമാണെന്നാണ് സിപിഎമ്മിന്റെ വിശദീകരണം. പുറത്ത് നിന്നും തൊഴിലാളികൾ എത്തിയത് പ്രദേശത്തെ തൊഴിലാളികൾ ചോദ്യം ചെയ്യുക മാത്രമാണ് ഉണ്ടായതെന്നാണ് വാദം.
