തൃശൂര്: പൊതു വിദ്യാഭ്യാസ ഡയറക്ടറുടെ താക്കീത് അവഗണിച്ച് എസ്.എസ്.എല്.സി പരീക്ഷാ ഹാളില് ഡ്യൂട്ടിയിലുണ്ടായിരിക്കെ മൊബൈല് ഫോണ് സൂക്ഷിച്ച ഇന്വിജിലേറ്റര്ക്കെതിരെ അച്ചടക്ക നടപടി സ്വീകരിക്കും. തൃശൂര് ജില്ലാ വിദ്യാഭ്യാസ ഓഫീസറുടെ നേതൃത്വത്തിലുള്ള പരീക്ഷാ സ്ക്വാഡാണ് മൊബൈല് ഫോണ് കണ്ടെടുത്തത്.
തൃശൂര് വിദ്യാഭ്യാസ ജില്ലയിലെ കാല്ഡിയന് സിലിയന് സ്കൂളിലെ പരീക്ഷാ ഹാളിലെ ഇന്വിജിലേറ്ററില് നിന്നാണ് ഫോണ് കണ്ടെടുത്തത്.തുടര്ന്ന് ഇന്വിജിലേറ്ററെ പരീക്ഷാ ഡ്യൂട്ടിയില് നിന്നും ഒഴിവാക്കി വിദ്യാഭ്യാസ ഓഫീസര് ഉത്തരവിറക്കി.
പരീക്ഷാ ഹാളില് മൊബൈല് ഫോണ് കൊണ്ടുവന്ന് ഉപയോഗിക്കരുതെന്ന പൊതു വിദ്യാഭ്യാസ ഡയറക്ടര് നേരത്തേ നിര്ദ്ദേശിച്ചിട്ടുണ്ട്. ഇത് അവഗണിച്ച് മൊബൈല് ഫോണ് സൂക്ഷിച്ച അധ്യാപികയ്ക്കും സെന്ററിലെ ചീഫ് സൂപ്രണ്ടിനും ഡെപ്യൂട്ടി ചീഫ് സൂപ്രണ്ടിനും എതിരെ മാതൃകാപരമായ അച്ചടക്ക നടപടി സ്വീകരിക്കും.
അതിനിടെ പരീക്ഷ അവസാനിക്കുന്ന ദിവസം കുട്ടികളുടെ ആഹ്ലാദ പ്രകടനങ്ങള് അതിരുവിടാതിരിക്കാന് ജാഗ്രതാ നടപടികള് സ്വീകരിച്ചു.മുന് വര്ഷങ്ങളില് ചില സ്കൂളുകളില് ഫര്ണിച്ചര്, ഫാന് തുടങ്ങിയവ കേടാക്കുക, പടക്കം പൊട്ടിക്കുക, വാഹനങ്ങള്ക്ക് കേടുപാടുകള് ഉണ്ടാക്കുക തുടങ്ങിയ രീതികള് ഉണ്ടായിട്ടുണ്ട്. ഇങ്ങനെ പെരുമാറുന്നവര്ക്കെതിരെ കര്ശന നടപടി ഉണ്ടാവും. പൊലീസ് സംരക്ഷണവും സ്കൂള് പരിസരത്ത് ഉണ്ടാകും. സ്കൂള് സാമഗ്രികള് നശിപ്പിച്ചാല്, ചെലവ് മുഴുവന് രക്ഷിതാവില് നിന്നും ഈടാക്കി മാത്രമേ വിടുതല് സര്ട്ടിഫിക്കറ്റ് നല്കൂവെന്നും ജില്ലാ വിദ്യാഭ്യാസ ഓഫീസര് അറിയിച്ചു.
