കോഴിക്കോട്: കൂടത്തായി കൊലപാതക കേസില് കുറ്റവിമുക്തയാക്കണമെന്ന് ആവശ്യപ്പെട്ട് മുഖ്യപ്രതി ജോളി സമര്പ്പിച്ച ഹര്ജി സുപ്രീം കോടതി തളളി. രണ്ടര വര്ഷമായി ജയിലാണെന്ന് ജോളി ഹര്ജിയില് ചൂണ്ടിക്കാട്ടിയപ്പോള് അങ്ങനെയെങ്കില് ജാമ്യപേക്ഷ നല്കാന് ആയിരുന്നു കോടതി പറഞ്ഞത്. ജോളിക്ക് വേണ്ടി അഭിഭാഷകന് സച്ചിന് പവഹ ഹാജരായി.
ജോളിയുടെ ഭര്ത്തൃമാതാവ് അന്നമ്മ തോമസ് ഉള്പ്പെടെ ഭര്ത്താവിന്റെ കുടുംബത്തിലെ ആറ് പേര് ദുരൂഹസാഹചര്യത്തില് കൊല്ലപ്പെട്ട കേസിലെ മുഖ്യ പ്രതിയാണ് ജോളി. 2019-ലാണ് കൊലപാതകങ്ങളുടെ വിവരം പുറത്തറിഞ്ഞത്.
2002 മുതല് 2016 വരെയുള്ള കാലത്ത് കൂടത്തായി പൊന്നാമറ്റം തറവാട്ടില് ഒരു കുടുംബത്തിലെ ആറ് പേര് ദുരൂഹസാഹചര്യത്തില് മരിച്ചതോടെയാണ് ജോളിയും കൂടത്തായിയും വാര്ത്തകളില് ഇടംപിടിക്കുന്നത്.റിട്ട. അധ്യാപികയായ അന്നമ്മ തോമസാണ് ആദ്യം മരിച്ചത്. ആട്ടിന് സൂപ്പ് കഴിച്ചതിന് പിന്നാലെ അന്നമ്മ കുഴഞ്ഞു വീണ് മരിക്കുകയായിരുന്നു. പിന്നീട് അന്നമ്മയുടെ ഭര്ത്താവ് ടോം തോമസും മകന് റോയ് തോമസും സമാന രീതിയില് മരിച്ചു.
പിന്നാലെ അന്നമ്മയുടെ സഹോദരന് എം.എം മാത്യു, ടോം തോമസിന്റെ സഹോദരന്റെ മകന് ഷാജുവിന്റെ ഒരു വയസുള്ള മകള് ആല്ഫൈന്, ഷാജുവിന്റെ ഭാര്യ ഫിലി എന്നിവരും മരിച്ചു. ഈ മരണങ്ങളിലെല്ലാം ദുരൂഹതയുണ്ടെന്ന പൊലീസ് റിപ്പോര്ട്ട് വഴിത്തിരിവായി. തുടര്ന്ന് നടത്തിയ അന്വേഷണത്തില് ആറു മരണങ്ങളും കൊലപാതകമെന്ന് പൊലീസ് കണ്ടെത്തി.
