അരവിന്ദ് കേജ്‌രിവാളിന്റെ അറസ്റ്റ് സ്വന്തം ചെയ്തികളുടെ ഫലം; മദ്യത്തിനെതിരെ പ്രവർത്തിച്ചയാൾ മദ്യനയങ്ങൾ ഉണ്ടാക്കുന്നു: പരിഹസിച്ച് അണ്ണാ ഹസാരെ

ന്യൂദൽഹി: ദൽഹി മദ്യനയ അഴിമതി കേസിൽ അറസ്റ്റിലായ ദൽഹി മുഖ്യമന്ത്രി അരവിന്ദ് കെജ്‌രിവാളിനെതിരെ അണ്ണാ ഹസാരെ. അരവിന്ദ് കേജ്‌രിവാളിന്റെ അറസ്റ്റ് സ്വന്തം ചെയ്തികളുടെ ഫലമാണെന്ന് അണ്ണാ ഹസാരെ പറഞ്ഞു. മദ്യത്തിനെതിരെ പ്രവർത്തിച്ചയാൾ അധികാരത്തിലെത്തിയപ്പോൾ മദ്യ നയം ഉണ്ടാക്കാൻ പോയി എന്ന് അണ്ണാ ഹസാരെ പരിഹസിച്ചു.

“മദ്യത്തിനെതിരെ ശബ്ദമുയർത്തുന്ന എന്റെ കൂടെ പ്രവർത്തിച്ച അരവിന്ദ് കേജ്‌രിവാൾ ഇപ്പോൾ മദ്യനയങ്ങൾ ഉണ്ടാക്കുന്നു. ഞാൻ വളരെ അസ്വസ്ഥനാണ്. സ്വന്തം ചെയ്തികൾ കൊണ്ടാണ് അറസ്റ്റ്. അധികാരത്തിന് മുന്നിൽ ഒന്നും ചെയ്യാൻ കഴിയില്ലെന്ന് അണ്ണാ ഹസാരെ പറഞ്ഞു. ഇന്നലെ രാത്രി കേജ്‌രിവാളിന്റെ വീട്ടിലെത്തി ചോദ്യം ചെയ്ത ശേഷമാണ് ഇ ഡി സംഘം അദ്ദേഹത്തെ അറസ്റ്റ് ചെയ്തത്.

2011ൽ അന്നത്തെ കോൺഗ്രസ് സർക്കാരിന്റെ അഴിമതിക്കെതിരെ അരവിന്ദ് കെജ്‌രിവാൾ അണ്ണാ പ്രസ്ഥാനത്തിൽ ചേർന്നിരുന്നു. ലക്ഷക്കണക്കിന് ആളുകളാണ് ഇരുനേതാക്കളുടെയും പിന്നിൽ അണിനിരന്നത്. എന്നിരുന്നാലും, പ്രതിഷേധം അവസാനിച്ചതിന് ശേഷം, കേജ്‌രിവാളും ഇന്ത്യ എഗെയിൻസ്റ്റ് കറപ്‌ഷന്റെ മറ്റ് നിരവധി അംഗങ്ങളും ചേർന്ന് ആം ആദ്മി പാർട്ടി രൂപീകരിച്ചു. പ്രതിഷേധം രാഷ്‌ട്രീയമല്ലെന്ന് വാദിച്ചിരുന്ന ഹസാരെ, എഎപി രൂപീകരിക്കാനുള്ള കേജ്‌രിവാളിന്റെ നീക്കത്തിൽ അതൃപ്തി പ്രകടിപ്പിച്ചിരുന്നു.

കേസിൽ ചോദ്യം ചെയ്യണമെന്ന് ആവശ്യപ്പെട്ട് ഇ ഡി കേജ്‌രിവാളിന് ഒൻപത് സമൻസുകൾ അയച്ചിരുന്നെങ്കിലും ഇതിനെയെല്ലാം അദ്ദേഹം അവഗണിക്കുകയായിരുന്നു.