പാറശ്ശാല: ബാങ്കില് അടയ്ക്കുന്നതിന് കൊണ്ടുവന്ന ഒന്നര ലക്ഷത്തോളം രൂപ ബാങ്കിന് മുന്നില് നിന്ന് കവര്ച്ച ചെയ്തതായി പരാതി. എസ്ബിഐയില് അടയ്ക്കുന്നതിനായി പണവുമായെത്തിയ കളിയിക്കാവിളയിലെ സ്വകാര്യ ധനകാര്യ സ്ഥാപനമായ വഞ്ചിനാട് ഫൈനാന്സിലെ ജീവനക്കാരന്റെ പണമാണ് കവര്ച്ച ചെയ്തത്.
കളിയിക്കാവിള പനങ്കാല സ്വദേശിയായ ശ്രീപ്രകാശിന്റെ പക്കല് നിന്നും 1,46,340 രൂപയാണ് മോഷണം പോയത്. പാറശ്ശാല ഓട്ടോസ്റ്റാന്ഡിന് സമീപത്തെ ബാങ്ക് ബ്രാഞ്ചിന് മുന്നില് വ്യാഴാഴ്ച ഉച്ചയ്ക്ക് ശേഷമാണ് സംഭവം. പണവുമായി ബാങ്കിലെത്തിയെങ്കിലും കുറച്ചുസമയം കാത്തുനില്ക്കേണ്ടിവന്നു.
ഈ സമയം ശ്രീപ്രകാശിന്റെ അടുത്തെത്തിയ രണ്ടുപേരില് ഒരാള് നെയ്യാറ്റിന്കരയിലേക്കുള്ള വഴി ചോദിക്കുകയും പറഞ്ഞുകൊടുക്കുന്ന സമയം പിന്നില് നിന്നിരുന്ന ആള് ശ്രീപ്രകാശിന്റെ ബാഗ് തുറന്ന് പണവുമായി കടന്നുകളയുകയുമായിരുന്നു. പാറശ്ശാല സ്റ്റേഷനില് എത്തി ശ്രീപ്രകാശ് പരാതി നല്കി.
