കോഴിക്കോട്: ഐ ലീഗ് ഫുട്‌ബോളില്‍ മുന്‍പ് രണ്ട് തവണ ചാമ്പ്യന്‍മാരായ ഗോകുലം കേരളയുടെ കിരീട പ്രതീക്ഷകള്‍ക്ക് കനത്ത മങ്ങലേറ്റു. ഇന്നലെ നടന്ന നിര്‍ണായക പോരാട്ടത്തില്‍ ശ്രീനിധി ഡെക്കാനോട് പരാജയപ്പെട്ടു. സ്വന്തം മൈതാനമായ കോഴിക്കോട് കോര്‍പ്പറേഷന്‍ സ്റ്റേഡിയത്തില്‍ 2-1നാണ് ടീം പരാജയപ്പെട്ടത്.
തോല്‍വിയോടെ ഗോകുലം പട്ടികയില്‍ രണ്ടില്‍ നിന്നും നാലാം സ്ഥാനത്തേക്ക് ഇടിഞ്ഞു. 36 പോയിന്റുള്ള ഗോകുലത്തെ മറികടന്ന് രണ്ടാം സ്ഥാനത്തെത്തിയ ശ്രീനിധി ഡെക്കാന് 39 പോയിന്റായി. ഇന്നലെ നടന്ന മറ്റൊരു കളിയില്‍ ഒന്നാം സ്ഥാനത്തുള്ള മുഹമ്മദന്‍ എസ് സി വിജയിച്ചതോടെ അവരുടെ പോയിന്റ് നില 47 ആയി ഉയര്‍ന്നു. അവശേഷിക്കുന്ന മത്സരങ്ങളില്‍ മുഹമ്മദന്‍ എല്ലാ കളികളിലും പരാജയപ്പെട്ടാലേ മറ്റ് ടീമുകള്‍ക്ക് ഇക്കുറി കിരീട സാധ്യതയുള്ളൂ.
ഇന്നലത്തെ മത്സരത്തില്‍ ആദ്യം സ്‌കോര്‍ ചെയ്തത് ഗോകുലം ആണ്. ആദ്യ പകുതിയില്‍ 44-ാം മിനിറ്റില്‍ നിക്കോള സ്‌റ്റോജനോവിച് ആണ് ഗോളടിച്ചത്. രണ്ടാം പകുതി ശ്രീനിധി സമനില പിടിച്ചുകൊണ്ടാണ് തുടങ്ങിയത്. 47-ാം മിനിറ്റില്‍ വില്ല്യം ആല്‍വെസ് ഡി ഓലിവേര ഗോളടിച്ചു. പിന്നീട് 71-ാം മിനിറ്റില്‍ അവര്‍ക്ക് അനുകൂലമായി ലഭിച്ച പെനല്‍റ്റിക്കായി കിക്കെടുത്തത് വില്ല്യം ആല്‍വെസ് ആയിരുന്നു. കിക്ക് വലയില്‍. ശ്രീനിധി വിജയഗോള്‍ കണ്ടെത്തി. പിന്നെ എതിരുണ്ടായില്ല.
പ്രതികരിക്കാൻ ഇവിടെ എഴുതുക: