പാലക്കാട്: ബിജെപി പാലക്കാട് ലോക് സഭാ മണ്ഡലം പിടിക്കുമെന്ന് പറയുന്നതിന് പിന്നില് വ്യക്തമായ കണക്കുകൂട്ടലുകള് ഉണ്ട്. അതുകൊണ്ട് തന്നെയാണ് പത്തനംതിട്ട കഴിഞ്ഞാല് മോദി പാലക്കാട്ടെത്തുന്നത്. 2019ല് ബിജെപി സ്ഥാനാര്ത്ഥി സി. കൃഷ്ണകുമാര് അവിടെ 21.44 ശതമാനം വോട്ടുകള് പിടിച്ചു. കൃത്യമായി നേടിയത് 2.18 ലക്ഷം വോട്ടുകള്.
2014ലെ ലോക്സഭാ തെരഞ്ഞെടുപ്പില് ബിജെപിയുടെ സ്ഥാനാര്ത്ഥിയായ ശോഭാ സുരേന്ദ്രന് അവിടെ 15 ശതമാനം വോട്ട് പിടിച്ചു. 1.36 ലക്ഷം വോട്ടുകളാണ് നേടിയത്. 2009ലെ തെരഞ്ഞെടുപ്പിനേക്കാള്6.29 ശതമാനം അധികവോട്ടുകള് അന്ന് ബിജെപിയ്ക്ക് വേണ്ടി ശോഭാ സുരേന്ദ്രന് നേടി. 2015ലാകട്ടെ ബിജെപി പാലക്കാട് മുനിസിപ്പല് തെരഞ്ഞെടുപ്പില് വിജയിച്ചു. അന്ന് യുഡിഎഫ് സ്ഥാനാര്ത്ഥി പ്രിയയെ തോല്പിച്ച ബിജെപിയുടെ പ്രമീള ശശിധരന് ബിജെപിയുടെ മുനിസിപ്പല് അധ്യക്ഷയായി. അന്ന് 52ല് 24 സീറ്റുകളാണ് ബിജെപി നേടിയത്. എന്നാല് 2020ല് വീണ്ടും മുനിസിപ്പല് തെരഞ്ഞെടുപ്പില് ഒരിയ്ക്കല് കൂടി ബിജെപി വിജയിച്ചു. ഇക്കുറി 2015നേക്കാള് നാല് സീറ്റുകള് അധികം പിടിച്ചുകൊണ്ടായിരുന്നു ബിജെപി ജയം. 52ല് 28 സീറ്റുകള് ബിജെപി നേടി.
2021ല് പാലക്കാട് നിയമസഭാ തെരഞ്ഞെടുപ്പില് മെട്രോമാന് എന്നറിയപ്പെടുന്ന ഇ.ശ്രീധരന് വെറും 3850 വോട്ടുകള്ക്ക് മാത്രമാണ് കോണ്ഗ്രസിന്റെ ഷാഫി പറമ്പിലിനോട് പരാജയപ്പെട്ടത്.
ഇക്കുറി മാറ്റുരയ്ക്കുന്നത് ജനകീയ സ്ഥാനാര്ത്ഥികളാണ്. സിപിഎം 2019ല് കോണ്ഗ്രസിനോടേറ്റ പരാജയത്തിന് പകരം വീട്ടാന് എ. വിജയരാഘവനെ ഇറക്കിയിരിക്കുന്നു. കോണ്ഗ്രസ് ഇക്കുറിയും വി.കെ. ശ്രീകണ്ഠനെത്തന്നെയാണ് ഇറക്കുന്നത്. പട്ടാമ്പി, ഷൊര്ണ്ണൂര്, ഒറ്റപ്പാലം, കോങ്ങാട്, മണ്ണാര്ക്കാട്, മലമ്പുഴ, പാലക്കാട് എന്നിവയാണ് പാലക്കാട് ലോക്സഭാ മണ്ഡലത്തില് ഉള്പ്പെട്ട ഏഴ് നിയോജകമണ്ഡലങ്ങള്.
