കോൺഗ്രസും ബിആർഎസും തെലങ്കാനയുടെ വികസന സ്വപ്നങ്ങൾ തകർത്തു : പ്രധാനമന്ത്രി മോദി

ഹൈദരാബാദ്: കോൺഗ്രസും ബിആർഎസും ചേർന്ന് തെലങ്കാനയുടെ വികസനത്തിന്റെ എല്ലാ സ്വപ്നങ്ങളും തകർത്തുവെന്ന് പ്രതിപക്ഷ പാർട്ടികളെ ആഞ്ഞടിച്ച് പ്രധാനമന്ത്രി നരേന്ദ്ര മോദി. തെലങ്കാനയിലെ നാഗർകുർണൂലിൽ ഒരു റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

കോൺഗ്രസും ബിആർഎസും ചേർന്ന് തെലങ്കാനയുടെ വികസനത്തെക്കുറിച്ചുള്ള എല്ലാ സ്വപ്നങ്ങളും തകർത്തു. അതിനാൽ മൂന്നാം തവണയും മോദിയെ തിരികെ കൊണ്ടുവരാൻ തെലങ്കാനക്കാർ തീരുമാനിച്ചതായി ഞാൻ ഇവിടെ കാണുന്നുവെന്ന് അദ്ദേഹം പറഞ്ഞു. കൂടാതെ രാജ്യത്ത് 25 കോടി ജനങ്ങളെ ദാരിദ്ര്യത്തിൽ നിന്ന് കരകയറ്റിയതായി അതേ മാറ്റം തെലങ്കാനയിലും നമ്മൾ എല്ലാവരും ചേർന്ന് കൊണ്ടുവരണം.

തിരഞ്ഞെടുപ്പ് ഷെഡ്യൂൾ പ്രഖ്യാപിക്കുന്നതിന് മുമ്പ് തന്നെ എൻഡിഎ 400 സീറ്റുകൾ കടക്കുമെന്ന കാര്യത്തിൽ ജനങ്ങൾ തീരുമാനമെടുത്തിരിക്കുകയാണെന്നും മോദി പറഞ്ഞു.

കോൺഗ്രസിനെതിരെ ആഞ്ഞടിച്ച പ്രധാനമന്ത്രി, പാർട്ടി ‘ഗരീബി ഹഠാവോ’ മുദ്രാവാക്യം നൽകിയെന്നും എന്നാൽ പാവപ്പെട്ടവരുടെ ജീവിതത്തിൽ എന്തെങ്കിലും മാറ്റം വന്നിട്ടുണ്ടോ എന്നും ചോദിച്ചു.