ന്യൂദല്‍ഹി: ലോക്സഭാ തെരഞ്ഞെടുപ്പില്‍ ഉത്തരാഖണ്ഡിലെ മുഴുവന്‍ സീറ്റിലും ബിജെപി വിജയം ആവര്‍ത്തിക്കുമെന്ന് മുന്‍ മുഖ്യമന്ത്രിയും ഹരിദ്വാര്‍ ലോക്സഭാ മണ്ഡലം സ്ഥാനാര്‍ത്ഥിയുമായ ത്രിവേന്ദ്ര സിങ് റാവത്ത്. സംസ്ഥാനത്ത് അഞ്ചു ലോക്സഭാ മണ്ഡലങ്ങളാണ് ഉള്ളത്. കഴിഞ്ഞ തവണത്തെ പോലെ തന്നെ ഇത്തവണയും മുഴുവന്‍ സീറ്റിലും ബിജെപി സ്ഥാനാര്‍ത്ഥികള്‍ വിജയിക്കുമെന്ന് ബിജെപി ദേശീയ ആസ്ഥാനത്ത് വച്ച് ജന്മഭൂമിക്ക് നല്കിയ അഭിമുഖത്തില്‍ അദ്ദേഹം പറഞ്ഞു.
ഇരട്ട എന്‍ജിന്‍ സര്‍ക്കാരിന്റെ നേട്ടങ്ങള്‍ സംസ്ഥാനത്ത് പാര്‍ട്ടിയുടെ വോട്ട് വിഹിതം വര്‍ധിപ്പിക്കും. പൊതുസിവില്‍കോഡ് നടപ്പാക്കിയ ആദ്യത്തെ സംസ്ഥാനമായി ബിജെപി ജനങ്ങള്‍ക്ക് നല്കിയ വാക്കുപാലിച്ചിരിക്കുകയാണ്. സിഎഎയ്‌ക്കെതിരായി പ്രതിപക്ഷ പാര്‍ട്ടികള്‍ കുപ്രചാരണങ്ങള്‍ നടത്തുന്നത് വോട്ടുബാങ്ക് ലക്ഷ്യമിട്ടാണ്. ജനം സത്യം തിരിച്ചറിയുമെന്നും അദ്ദേഹം പറഞ്ഞു.
ജനങ്ങള്‍ക്ക് നല്കിയ വാഗ്ദാനങ്ങള്‍ പാലിച്ചു കൊണ്ട് ബിജെപി സര്‍ക്കാര്‍ മുന്നോട്ടു പോകുകയാണ്. ആര്‍ട്ടിക്കിള്‍ 370 എടുത്തുകളഞ്ഞു. ആര്‍ട്ടിക്കിള്‍ 370 റദ്ദാക്കുമെന്ന് ബിജെപി വാഗ്ദാനം ചെയ്തതാണ്, അത് നടപ്പാക്കി. ജനസംഘകാലം മുതല്‍ ഉയര്‍ത്തുന്ന ആവശ്യമാണത്. സിഎഎ നടപ്പാക്കുമെന്ന് ബിജെപി വ്യക്തമാക്കിയതാണ്. സിഎഎക്കായി നിലകൊള്ളുമെന്നും അദ്ദേഹം വ്യക്തമാക്കി.
ഇന്‍ഡി സഖ്യം വെറും പേരില്‍ മാത്രമാണ്. അതുകൊണ്ട് ജനങ്ങള്‍ക്ക് യാതൊരു പ്രയോജനവുമില്ല. അഴിമതിയും കുടുംബവാഴ്ചയും സ്വജനപക്ഷപാതവും മുഖമുദ്രയാക്കിയ കോണ്‍ഗ്രസാണ് സഖ്യത്തിന് നേതൃത്വം നല്‍കുന്നത്. ജനങ്ങള്‍ തള്ളിക്കളഞ്ഞവര്‍ ബിജെപിക്കെതിരെ ഒറ്റക്കെട്ടായി വന്നിരിക്കുകയാണ്. എന്നാല്‍ ജനം ബിജെപിക്കും എന്‍ഡിഎക്കും ഒപ്പമാണെന്ന് തെരഞ്ഞെടുപ്പ് ഫലം പുറത്തുവരുന്നതോടെ ബോധ്യമാകും. നരേന്ദ്ര മോദിയുടെ നേതൃത്വത്തില്‍ എന്‍ഡിഎ സര്‍ക്കാര്‍ വീണ്ടും അധികാരത്തില്‍ വരുമെന്നും അദ്ദേഹം കൂട്ടിച്ചേര്‍ത്തു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: