കൊളംബോ: ശ്രീലങ്കന്‍ ക്രിക്കറ്റ് ടീം മുന്‍ നായകന്‍ ലഹിരു തിരിമന്നെ ചെറിയ പരിക്കുകളോടെ കാര്‍ അപകടത്തില്‍ നിന്ന് അത്ഭുതകരമായി രക്ഷപ്പെട്ടു. അനുരാധപുരയിലെ തിരിപ്പാനയില്‍ തിരിമന്നെ സഞ്ചരിച്ച കാര്‍ ലോറിയുമായി നേര്‍ക്കുനേര്‍ കൂട്ടിയിടിക്കുകയായിരുന്നു.
അപകടത്തില്‍ കാറിന്റെ മുന്‍ഭാഗം പൂര്‍ണമായും തകര്‍ന്നെങ്കിലും തിരിമന്നെ നിസാര പരിക്കുകളോടെ രക്ഷപ്പെട്ടു. പരിക്കുകള്‍ സാരമുള്ളതെങ്കിലും ആശുപത്രിയില്‍ പ്രവേശിപ്പിക്കപ്പെട്ട തിരിമന്നെ ഡോക്ടര്‍മാരുടെ നിരീക്ഷണത്തിലാണ്. രാജ്യാന്തര ക്രിക്കറ്റില്‍ നിന്ന് വിരമിച്ച 34കാരനായ തിരിമന്നെ നിലവില്‍ ലെജന്‍ഡ്‌സ് ക്രിക്കറ്റില്‍ ന്യൂയോര്‍ക്ക് സ്‌ട്രൈക്കേഴ്‌സിന് വേണ്ടി കളിക്കുകയാണ്. ഇടംകൈയന്‍ ബാറ്ററായിരുന്ന തിരിമന്നെ സനത് ജയസൂര്യയുടെ പിന്‍ഗാമിയായി ഓപ്പണറായാണ് 2010ല്‍ ലങ്കന്‍ ടീമില്‍ അരങ്ങേറിയത്.
എന്നാല്‍ കുമാര്‍ സംഗക്കാര, ലസിത് മലിംഗ, മഹേല ജയവര്‍ധനെ തുടങ്ങിയ ഇതിഹാസ താരങ്ങള്‍ വിരമിച്ചതോടെ ദുര്‍ബലമായ ലങ്കന്‍ ടീമിനെ പ്രതിസന്ധികാലത്ത് നയിച്ചത് തിരിമന്നെയായിരുന്നു. പിന്നീട് കുശാല്‍ മെന്‍ഡിസ്, പാതും നിസങ്ക, ആവിഷ്‌ക ഫെര്‍ണാണ്ടോ തുടങ്ങിയ യുവതാരങ്ങള്‍ ടീമിലെത്തിയതോടെ ടീമില്‍ നിന്ന് പുറത്തായ തിരിമന്നെ 2023 ജൂലൈയില്‍ ക്രക്കറ്റില്‍ നിന്ന് അപ്രതീക്ഷിതമായി വിരമിക്കല്‍ പ്രഖ്യാപിക്കുകയായിരുന്നു. ലങ്കക്കായി 44 ടെസ്റ്റിലും 127 ഏകദിനത്തിലും 26 ടി20 മത്സരങ്ങളിലും കളിച്ച തിരിമന്നെ 2014ലെ ടി20 ലോകകപ്പ് നേടിയ ലങ്കന്‍ ടീമിലും അംഗമായിരുന്നു.
പ്രതികരിക്കാൻ ഇവിടെ എഴുതുക: