കൊച്ചി : 130 കോടി രൂപ വായ്പ തരപ്പെടുത്താമെന്ന് വാഗ്ദാനം നല്കി പ്രമുഖ നടിയില് നിന്നു 37 ലക്ഷം രൂപ തട്ടിയ കൊല്ക്കത്ത സ്വദേശിയെ കൊച്ചി പൊലീസ് അറസ്റ്റ് ചെയ്തു. യാസര് ഇഖ്ബാലിനെ(51)യാണ് സാഹസികമായി കൊല്ക്കത്തയില് നിന്ന് പിടികൂടിയത്.
കൊച്ചി സിറ്റി സൈബര് സെല്ലിന്റെ പിന്തുണയോടെ പാലാരിവട്ടം പൊലീസിലെ പ്രത്യേകാന്വേഷണ സംഘം തട്ടിപ്പു സംഘത്തിലെ മറ്റൊരാളെ കൂടി പിടികൂടാനുള്ള നീക്കം നടത്തുകയാണ്.
വായ്പ തരപ്പെടുത്താമെന്ന് വിശ്വസിപ്പിച്ചാണ് പ്രതി നടിയുമായി സൗഹൃദം സ്ഥാപിച്ചത്. തുടര്ന്ന് വായ്പ ലഭിക്കുന്നതിനായി നടി തട്ടിപ്പു സംഘത്തിന് കൊച്ചിയിലെ പ്രമുഖ ഹോട്ടലില് വച്ച് 37 ലക്ഷം രൂപ കൈമാറി. പണം കൈമാറിയിട്ടും വായ്പ ലഭ്യമാകാതെ വന്നതോടെയാണ് നടി പൊലീസിനെ സമീപിച്ചത്.
അന്വേഷണത്തില് പ്രതികളെ മനസിലാക്കിയ പാലാരിവട്ടം പൊലീസ് കൊല്ക്കത്തയ്ക്ക് തിരിച്ചു. തുടര്ന്നാണ് നഗരത്തിലെ ടാഗ്രാ പൊലീസ് സ്റ്റേഷന് പരിധിയിലുള്ള ഫ്ലാറ്റില് ഒളിവില് കഴിയുകയായിരുന്ന പ്രതിയെ പിടികൂടിയത്.
