കോട്ടയം: അസഹനീയമായ ചൂട്, നാട്ടിലെ സര്വ ക്ഷേത്രങ്ങളിലും ഉത്സവവും കലാപരിപാടികളും, യുവജനങ്ങള്ക്ക് ഹരം പകര്ന്ന് തകര്ത്തോടുന്ന പുതിയ സിനിമകള് ഒടുവിലിതാ കൂനിന്മേല് കുരു എന്ന പോലെ മോഹന്ലാല് നയിക്കുന്ന ബിഗ് ബോസിന്റെ പുതിയ സീസണ് തുടക്കവും.
വിദ്യാര്ത്ഥികള് എന്തൊക്കെ പ്രലോഭനങ്ങളെ അതിജീവിക്കണം ഈ പരീക്ഷാക്കാലമൊന്നു കടന്നു കിട്ടാന്. ദൈവമേ എന്ന് ആകുലപ്പെടുകയാണ് രക്ഷിതാക്കളും അദ്ധ്യാപകരും!.
മറ്റ് ക്ലാസുകാരുടേതിനൊപ്പം ഭാവി നിര്ണ്ണയിക്കുന്ന എസ്.എസ്.എല്.സി പ്ലസ് വണ്, പ്ലസ് ടു പരീക്ഷകളും ഈ കടുത്ത വേനല് കാലത്താണ് നടക്കുന്നത്. ലക്ഷ്യബോധമുള്ള കുട്ടികളെ സംബന്ധിച്ച് പുറത്തു നടക്കുന്നതൊന്നും പ്രശ്നമല്ല. എന്നാല് ശരാശരിക്കാര് ഇതിനെയൊക്കെ അതിജീവിച്ച് പഠിച്ച് നല്ല മാര്ക്കു നേടാന് ഏറെ പാടുപെടും.
വിദ്യാര്ത്ഥികളേക്കാള് ഇക്കാര്യത്തില് ആശങ്ക രക്ഷിതാക്കള്ക്കാണ്. അതുകൊണ്ടുതന്നെ മോഹന്ലാലല്ല , ഏതു ബിഗ് ബോസ് വന്നു വിളിച്ചാലും ടി.വി തുറക്കില്ലെന്ന ശാഠ്യത്തിലാണ് അവര്. ബിഗ്ബോസൊക്കെ പരീക്ഷ കഴിഞ്ഞിട്ടു തുടങ്ങിയാൽ എന്തായിരുന്നു കുഴപ്പം എന്നാണവരുടെ ചോദ്യം.
