തിരുവനന്തപുരം: നവവധു ആത്മഹത്യ ചെയ്ത സംഭവത്തില്‍ ഭര്‍ത്താവ് അറസ്റ്റില്‍. കല്ലാമം ഷിബിന്‍ ഭവനില്‍ വി. വിപിനെയാണ് കാട്ടാക്കട പൊലീസ് അറസ്റ്റ് ചെയ്തത്. ആത്മഹത്യാ പ്രേരണക്കുറ്റം, സ്ത്രീധന പീഡനം തുടങ്ങിയ കുറ്റങ്ങളാണ് ചുമത്തിയത്.
വിവാഹം കഴിഞ്ഞ് 15ാം ദിവസമാണ് പി.എസ്. സോനയെ (24)ആത്മഹത്യ ചെയ്ത നിലയില്‍ കണ്ടെത്തിയത്.കഴിഞ്ഞ വര്‍ഷം ജൂലായ് 2 നാണ് സംഭവം.പന്നിയോട് തണ്ണിച്ചാന്‍കുഴി സ്വദേശി സോന ഭവനില്‍ പ്രഭാകരന്‍- എം.ശൈലജ ദമ്പതികളുടെ മകളാണ്.
വിപിന്റെ വീട്ടിലെ കിടപ്പുമുറിയില്‍ തൂങ്ങി മരിച്ച നിലയിലാണ് കണ്ടെത്തിയത്. വര്‍ഷങ്ങളായി പ്രണയത്തിലായിരുന്നു ഇരുവരും. ബന്ധുക്കള്‍ ഇടപെട്ട് വിവാഹം ആര്‍ഭാടമായി നടത്തിയ വിവാഹശേഷം ഭര്‍ത്താവിനൊപ്പം സ്വന്തം വീട്ടിലെത്തിയ സോന സന്തോഷവതിയായിരുന്നുവെന്നും ദിവസങ്ങള്‍ക്കുള്ളില്‍ എന്താണ് സംഭവിച്ചതെന്നതില്‍ അന്വേഷണം വേണമെന്നുമാണ് വീട്ടുകാര്‍ ആവശ്യപ്പെട്ടത്.
കാട്ടാക്കടയിലെ ആധാരമെഴുത്ത് സ്ഥാപനത്തില്‍ ഒരു വര്‍ഷത്തോളമായി ജോലി ചെയ്ത് വരികയായിരുന്നു സോന. യുവതി മരിച്ച ദിവസം രാത്രി 9ന് വിപിന്‍ ഉറങ്ങിയെന്ന് പറയുമ്പോഴും 10.30വരെ ഓണ്‍ലൈനില്‍ ഉണ്ടായിരുന്നതായി പൊലീസ് കണ്ടെത്തി.ബന്ധുക്കളുടെ പരാതിയുടെ അടിസ്ഥാനത്തില്‍ അസ്വാഭാവിക മരണത്തിന് കാട്ടാക്കട പൊലീസ് കേസെടുത്ത് അന്വേഷണം നടത്തി ബുധനാഴ്ച വിപിനെ അറസ്റ്റ് ചെയ്യുകയായിരുന്നു.
പ്രതികരിക്കാൻ ഇവിടെ എഴുതുക: