ബെംഗളൂരു: രാമേശ്വരം കഫേയിലെ സ്‌ഫോടനക്കേസിലെ പ്രതിയുടെ മാസ്‌ക് വെച്ച് മറയ്‌ക്കാത്ത ചിത്രം പുറത്ത്. നഗരത്തില്‍ ബിഎംടിസി ബസുകളില്‍ ഒന്നിലുള്ള സിസിടിവിയിലാണ് ഇയാളുടെ മുഖം വ്യക്തമായി പതിഞ്ഞിട്ടുള്ളത്.
കഫെയില്‍ ബോംബ് വച്ച് തിരികെ പോയ ഇയാള്‍ വഴിയില്‍വച്ച് വസ്ത്രം മാറിയതായി എന്‍ഐഎ ഉദ്യോഗസ്ഥര്‍ പറഞ്ഞു. സ്ഫോടനത്തിനു ശേഷവും മുമ്പും വ്യത്യസ്തമായ വസ്ത്രങ്ങളാണ് ഇയാള്‍ ധരിച്ചിരിക്കുന്നത്. കഫേയില്‍ വന്നപ്പോള്‍ ധരിച്ചിരുന്ന, പത്ത് എന്നെഴുതിയ തൊപ്പി വഴിയരികില്‍ ഉപക്ഷിച്ചത് എന്‍ഐഎ കണ്ടെടുത്തു. ഒന്നിലധികം ബിഎംടിസി ബസുകളില്‍ ഇയാള്‍ സഞ്ചരിച്ചിട്ടുമുണ്ട്.
രാമേശ്വരം കഫേയില്‍ നിന്ന് തിരികെ പോകുന്ന വഴിയില്‍ ഇയാള്‍ ഒരു ആരാധനാലയത്തില്‍ കയറിയിട്ടുണ്ട്. ബോംബ് ഉള്ള ടിഫിന്‍ കാരിയര്‍ രാമേശ്വരം കഫേയില്‍ വച്ചശേഷം തിരികെ പോകാന്‍ ഒരു കിലോമീറ്റര്‍ ദൂരെയുള്ള ബസ് സ്റ്റോപ്പിലേക്ക് നടന്നുവെന്നും സിസിടിവി ദൃശ്യങ്ങളിലൂടെ എന്‍ഐഎ കണ്ടെത്തിയിട്ടുണ്ട്. ഇയാളെ കണ്ടെത്താന്‍ സഹായിക്കുന്നവര്‍ക്ക് പത്ത് ലക്ഷം രൂപ പാരിതോഷികം എന്‍ഐഎ പ്രഖ്യാപിച്ചിട്ടുണ്ട്. മാര്‍ച്ച് ഒന്നിനാണ് കുന്ദലഹള്ളിയിലെ രാമേശ്വരം കഫേയില്‍ സ്ഫോടനം ഉണ്ടാകുന്നത്. സംഭവത്തില്‍ ഒമ്പതുപേര്‍ക്ക് പരിക്കേറ്റിരുന്നു.
പ്രതികരിക്കാൻ ഇവിടെ എഴുതുക: