അതിർത്തികളുടെ സുരക്ഷയിൽ ഒരു വിട്ടുവീഴ്ചയുമില്ല : ഇന്ത്യ- ബംഗ്ലാദേശ് ഡയറക്ടർ ജനറൽമാരുടെ ചർച്ച ഏറെ സുപ്രധാനം

ന്യൂദൽഹി: അതിർത്തി കടന്നുള്ള കുറ്റകൃത്യങ്ങൾ തടയുന്നതിനും സുരക്ഷാ സേനയും ഏജൻസികളും തമ്മിൽ മികച്ച ഏകോപനം സൃഷ്ടിക്കുന്നതിനുള്ള നടപടികളുമായി ബന്ധപ്പെട്ട നിരവധി വിഷയങ്ങൾ ചർച്ച ചെയ്യുന്നതിനുമായി ഇന്ത്യയും ബംഗ്ലാദേശും ധാക്കയിൽ തങ്ങളുടെ ദ്വിവാർഷിക ഡിജി തല അതിർത്തി ചർച്ചകൾ ചൊവ്വാഴ്ച ആരംഭിച്ചു.

ബോർഡർ സെക്യൂരിറ്റി ഫോഴ്സ് (ബിഎസ്എഫ്) ഡയറക്ടർ ജനറൽ നിതിൻ അഗർവാളിന്റെ നേതൃത്വത്തിലുള്ള സംഘം മാർച്ച് 5 മുതൽ 9 വരെയാണ് ബോർഡർ ഗാർഡ് ബംഗ്ലാദേശുമായി (ബിജിബി) ധാക്കയിൽ കൂടിക്കാഴ്ച നടത്തുന്നത്.

ബിജിബി ഡയറക്ടർ ജനറൽ മേജർ ജനറൽ മുഹമ്മദ് അഷ്‌റഫുസ്സമാൻ സിദ്ദിഖി ബംഗ്ലാദേശ് പ്രതിനിധി സംഘത്തെ നയിക്കും. അതിർത്തി കുറ്റകൃത്യങ്ങൾ തടയൽ, അതിർത്തിയിലെ അടിസ്ഥാന സൗകര്യവുമായി ബന്ധപ്പെട്ട പ്രശ്നങ്ങൾ, ഏകോപിത അതിർത്തി മാനേജ്മെൻ്റ് പ്ലാൻ (സിബിഎംപി), നദീതീര സംരക്ഷണം എന്നിവ ഫലപ്രദമായി നടപ്പാക്കുന്നതിനുള്ള സംയുക്ത ശ്രമങ്ങൾ എന്നിവയുമായി ബന്ധപ്പെട്ട വിവിധ വിഷയങ്ങൾ അതിർത്തി ഏകോപന സമ്മേളനത്തിൽ ഇരുപക്ഷവും ചർച്ച ചെയ്യും.

ഇരു സേനകളും തമ്മിലുള്ള ചർച്ചയുടെ 54-ാം പതിപ്പാണിത്. അതിർത്തി സുരക്ഷയുമായി ബന്ധപ്പെട്ട നിരവധി വിഷയങ്ങൾ ഇരുപക്ഷവും ചർച്ച ചെയ്യുമെന്ന് പ്രതീക്ഷിക്കുന്നുണ്ടെന്ന് കേന്ദ്ര ആഭ്യന്തര മന്ത്രാലയത്തിലെ മുതിർന്ന ഉദ്യോഗസ്ഥൻ കഴിഞ്ഞ മാസം പറഞ്ഞിരുന്നു.

പ്രധാനമായും ബംഗ്ലാദേശ് ക്രിമിനലുകൾ ബിഎസ്എഫ് ജവാൻമാർക്കും സാധാരണക്കാർക്കും നേരെയുള്ള ആക്രമണങ്ങൾ തടയുന്നതിനുള്ള നടപടികൾ, ചരക്ക് കടത്ത്, വ്യാജ ഇന്ത്യൻ കറൻസി തുടങ്ങിയ കുറ്റകൃത്യങ്ങൾ നടയുന്നതിന് സംയുക്തമായി പരിശോധന , കോർഡിനേറ്റഡ് ബോർഡർ മാനേജ്‌മെൻ്റ് പ്ലാൻ (സിബിഎംപി) മെച്ചപ്പെടുത്തുക, അതിർത്തി വേലിയിലെ അനധികൃത നിർമ്മാണ പ്രവർത്തനങ്ങൾ പരിശോധിക്കുക, തുടങ്ങിയ കാര്യങ്ങളെല്ലാം ചർച്ചയാകും.

രാജ്യത്തിന്റെ കിഴക്ക് ഭാഗത്ത് ബംഗ്ലാദേശുമായി 4,096 കിലോമീറ്റർ ദൈർഘ്യമുള്ള അതിർത്തിയിൽ ബിഎസ്എഫ് ആണ് കാവൽ നിൽക്കുന്നത്. 1975 നും 1992 നും ഇടയിൽ ഡിജി തലത്തിലുള്ള അതിർത്തി ചർച്ചകൾ വർഷം തോറും നടന്നിരുന്നു. എന്നാൽ 1993-ൽ അത് ദ്വിവാർഷികമാക്കുകയായിരുന്നു. 2023 ജൂണിൽ ദൽഹിയിലാണ് അവസാന ചർച്ചകൾ നടന്നത്.