ഹൈദരാബാദ് : ഹൈദരാബാദിൽ മെട്രോ റെയിൽ വിപുലീകരിക്കുന്നതിനും നഗരത്തിലെ മൂസി നദീതീര വികസനത്തിനും സംസ്ഥാന സർക്കാരിനെ സഹായിക്കണമെന്ന് തെലങ്കാന മുഖ്യമന്ത്രി എ. രേവന്ത് റെഡ്ഡി ചൊവ്വാഴ്ച പ്രധാനമന്ത്രി നരേന്ദ്ര മോദിയോട് അഭ്യർത്ഥിച്ചു.
സംസ്ഥാനത്ത് എൻടിപിസിയുടെ വൈദ്യുതി ഉൽപ്പാദനശേഷി 4,000 മെഗാവാട്ട് ആണെങ്കിലും മുൻ സർക്കാരിന് 1,600 മെഗാവാട്ട് മാത്രമാണ് നേടാനായതെന്നും ബാക്കിയുള്ള 2,400 മെഗാവാട്ട് കൂടി യാഥാർഥ്യമാക്കാൻ കേന്ദ്രം സംസ്ഥാനത്തെ സഹായിക്കണമെന്നും സംസ്ഥാന സർക്കാർ പുറത്തിറക്കിയ പ്രസ്താവനയിൽ പറയുന്നു.
സംസ്ഥാനത്തെ നിർദിഷ്ട തുമ്മിടിഹെട്ടി ലിഫ്റ്റ് ഇറിഗേഷൻ പദ്ധതിയുടെ നിർമ്മാണത്തിനായി അയൽ സംസ്ഥാനമായ മഹാരാഷ്‌ട്രയെ ഭൂമി ഏറ്റെടുക്കുന്നതിനും മറ്റുമായി സമ്മതം നൽകുന്നതിന് സംസ്ഥാന സർക്കാർ പ്രധാനമന്ത്രിയുടെ ഇടപെടൽ ആവശ്യപ്പെട്ടു.
കൂടാതെ ഹൈദരാബാദ്-ശ്രീശൈലം ദേശീയ പാതയിലെ അമ്രാബാദ് കടുവാ സങ്കേതത്തിൽ എലിവേറ്റഡ് ഇടനാഴിയുടെ നിർമ്മാണം, സംസ്ഥാനത്തെ എല്ലാ വീടുകളിലും പൈപ്പ് ജലവിതരണം നടത്തുന്നതിനുള്ള സാമ്പത്തിക സഹായം തുടങ്ങി വിവിധ വിഷയങ്ങളിൽ റെഡ്ഡി കേന്ദ്ര സർക്കാരിന്റെ സഹായം തേടി.
രണ്ട് ദിവസത്തെ തെലങ്കാന സന്ദർശനത്തിനെത്തിയ മോദിയെ ഇന്നലെ ബീഗംപേട്ട് വിമാനത്താവളത്തിൽ ഗവർണർ തമിഴിസൈ സൗന്ദരരാജനും മുഖ്യമന്ത്രിയും മന്ത്രിസഭയിലെ സഹപ്രവർത്തകരും മറ്റ് പ്രമുഖരും ചേർന്ന് യാത്രയയപ്പ് നൽകി.
പ്രതികരിക്കാൻ ഇവിടെ എഴുതുക: