ഗോകുലം കേരളയ്‌ക്ക് തിരിച്ചടി; നാംധാരിയോട് പരാജയപ്പെട്ടു

ലുധിയാന: ഐ ലീഗില്‍ വിജയക്കുതിപ്പുമായി മുന്നേറിയ ഗോകുലം കേരളയ്‌ക്ക് തിരിച്ചടി. ഇന്നലെ നടന്ന പോരാട്ടത്തില്‍ നാംധാരി എഫ്‌സി ആണ് ടീമിനെ തോല്‍പ്പിച്ചത്. ഗോകുലത്തിന്റെ ഒന്നിനെതിരെ രണ്ട് ഗോളുകള്‍ക്കായിരുന്നു നാംധാരിയുടെ വിജയം.

മത്സരത്തിന്റെ തുടക്കത്തിലേ തന്നെ നാംധാരി സ്‌കോര്‍ ചെയ്തു. മൂന്നാം മിനിറ്റില്‍ ഹര്‍മന്‍പ്രീത് സിങ് ആണ് ഗോള്‍ നേടിയത്. ആദ്യ പകുതിയില്‍ അവര്‍ ഈ ഒരു ഗോളിന്റെ ബലത്തില്‍ മുന്നിട്ടു നിന്നു. രണ്ടാം പകുതിയില്‍ 83-ാം മിനിറ്റില്‍ പകരക്കാരനായി ഇറങ്ങിയ സൗരവ്.കെ ഗോകുലത്തിനായി സമനില കണ്ടെത്തി. നിര്‍ണായകമായ 83-ാം മിനിറ്റില്‍ നേടിയ ഗോളിലൂടെ ഗോകുലം സമനില ഉറപ്പാക്കിയെന്ന് തോന്നിച്ചു. ഒടുവില്‍ ഇന്‍ജുറി ടൈം ഗോളില്‍ നാംധാരി വിജയം കുറിച്ചു. മത്സരത്തിന്റെ 90+7-ാം മിനിറ്റില്‍ ആകാശ് ദീപ് സിങ് ആണ് ഗോള്‍ നേടിയത്. ഇന്‍ജുറി ടൈം മത്സരം 13 മിനിറ്റ് വരെ നീണ്ടു.

തോല്‍വിയോടെ ഗോകുലം പട്ടികയില്‍ മൂന്നാം സ്ഥാനത്തേക്ക് ഇടിഞ്ഞു. 32 പോയിന്റാണ് ടീമിനുള്ളത്. ഇന്നലെ നടന്ന മുഹമ്മദന്‍ സ്‌പോര്‍ട്ടിങ് ക്ലബ്ബ്-ശ്രീനിധി ഡെക്കാന്‍ പോരാട്ടം സമനിലയില്‍ കലാശിച്ചതോടെ മൂന്നാം സ്ഥാനത്തായിരുന്ന ശ്രീനിധി ഗോകുലത്തെ മറികടന്നു. മുഹമ്മദന്‍ എസ് സിക്ക് 35 ഉം ശ്രീനിധിക്ക് 33 പോയിന്റുമാണുള്ളത്. ഞായറാഴ്ച കോഴിക്കോട്ട് നടക്കുന്ന പോരാട്ടത്തില്‍ ഗോകുലം മുഹമ്മദന്‍ എസ്‌സിയെ നേരിടും.