കോട്ടയം: ഇനി വരുന്ന അദ്ധ്യായന വർഷം മുതൽ ആർട്സ് ആൻഡ് സയൻസ് കോളേജുകളിൽ നാല് വർഷ ബിരുദ പ്രോഗ്രാമുകൾ ആരംഭിക്കും. ഇത് സംബന്ധിച്ച് മഹാത്മാഗാന്ധി യൂണിവേഴ്സിറ്റിയിൽ ചട്ടങ്ങളായി. നിലവിൽ മൂന്ന് വർഷമുള്ള 54 ബിരുദ പ്രോഗ്രാമുകളാണ് നാല് വർഷമാകുക.
കൂടാതെ മൂന്ന് വർഷം പൂർത്തിയാക്കി പരീക്ഷ ജയിക്കുന്നവർക്ക് ബിരുദ സർട്ടിഫിക്കറ്റ് ലഭിക്കുമെന്നും ഇതോടെ വേണമെങ്കിൽ കോഴ്സ് മതിയാക്കുന്നതിനുള്ള അവസരമുണ്ടെന്നും എംജി യൂണിവേഴ്സിറ്റി പുറത്തിറക്കിയ ഉത്തരവിൽ പറയുന്നു. എന്നാൽ നാല് വർഷം പൂർത്തിയാക്കുന്ന വിദ്യാർത്ഥികൾക്ക് മാത്രമാകും ഓണേഴ്സ് ബിരുദം ലഭ്യമാക്കുക. മൂന്ന് വർഷക്കാലത്ത് മികച്ച ക്രെഡിറ്റ് നേടുന്നവർക്കാണ് നാലാം വർഷ ഓണേഴ്സ് വിത്ത് റിസർച്ചിന് അവസരം ലഭ്യമാകുക. മൂന്ന് വർഷത്തിന് ശേഷം ബിരുദ സർട്ടിഫിക്കറ്റ് വാങ്ങിയാൽ ഈ അവസരം നഷ്ടമാകും.
ബിരുദ വിദ്യാർത്ഥികൾ ഒന്നാം വർഷം പൂർത്തിയാക്കിയാൽ സർട്ടിഫിക്കറ്റും രണ്ട് വർഷമാണ് പൂർത്തിയാക്കുന്നതെങ്കിൽ ഡിപ്ലോമയും നൽകുന്ന രീതിയിലാണ് ദേശീയ വിദ്യാഭ്യാസ നയം പ്രാബല്യത്തിൽ വന്നിരിക്കുന്നത്. ഇത് സംബന്ധിച്ച് പഠിക്കുന്നതിനായി യുജിസി വിദഗ്ധ സമിതിയെ നിയോഗിച്ചിരിക്കുകയാണ്. ഇതിനാൽ തന്നെ എംജി യൂണിവേഴ്സിറ്റിയിലും ആദ്യ രണ്ട് വർഷം എക്സിറ്റ് നിലവിൽ ലഭ്യമല്ല.
