മലപ്പുറം: പ്രധാനമന്ത്രി നരേന്ദ്ര മോദി നടപ്പിലാക്കിയ പദ്ധതികളിലും ക്ഷേമപ്രവര്‍ത്തനങ്ങളിലും ഒരു വിവേചനവും കാണിച്ചിട്ടില്ലെന്നും അതുകൊണ്ടു തന്നെ വലിയൊരു വിഭാഗം മുസ്ലിങ്ങളുടെ വോട്ടും പിന്തുണയും അദ്ദേഹത്തിന് ലഭിക്കുന്നുണ്ടെന്നും മുന്‍ കേന്ദ്രമന്ത്രി മുഖ്താര്‍ അബ്ബാസ് നഖ്‌വി. കേരള പദയാത്രയുടെ മലപ്പുറം ലോക്സഭാ മണ്ഡല പര്യടനം ഉദ്ഘാടനം ചെയ്യുകയായിരുന്നു അദ്ദേഹം.
ലോക്സഭാ തെരഞ്ഞെടുപ്പുമായി ബന്ധപ്പെട്ട യോഗത്തില്‍ പങ്കെടുക്കാന്‍ ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ ദല്‍ഹിയിലേക്ക് പോയതിനാല്‍ പാര്‍ട്ടി ദേശീയ ഉപാദ്ധ്യക്ഷന്‍ എ.പി. അബ്ദുള്ളക്കുട്ടിയാണ് യാത്ര നയിച്ചത്.
ബിജെപിയെ പരാജയപ്പെടുത്താനുള്ള നിഷേധാത്മകമായ അഭിനിവേശത്തില്‍ നിന്ന് ഇപ്പോള്‍ ഭൂരിഭാഗം മുസ്ലിങ്ങളും പുറത്തു വന്നിട്ടുണ്ട്. പല സംസ്ഥാനങ്ങളിലും അടുത്തിടെ നടന്ന തെരഞ്ഞെടുപ്പുകളില്‍ മുസ്ലിങ്ങള്‍ ബിജെപിക്ക് വന്‍തോതില്‍ വോട്ട് ചെയ്തു. എന്‍ഡിഎ ഭരിക്കുന്ന സംസ്ഥാനങ്ങള്‍ കലാപങ്ങളില്‍ നിന്നും ഭീകര പ്രവര്‍ത്തനത്തില്‍ നിന്നും മുക്തമായി. കഴിഞ്ഞ പത്തു വര്‍ഷത്തിനിടെ വിവിധ കേന്ദ്ര ക്ഷേമ പദ്ധതികള്‍ കേരളത്തിലെ എല്ലാ വിഭാഗങ്ങള്‍ക്കും ലഭിച്ചിട്ടുണ്ട്, അദ്ദേഹം പറഞ്ഞു. പദയാത്ര കിഴക്കെതലയില്‍ നിന്ന് കൂറ്റിലങ്ങാടിയില്‍ സമാപിച്ചു.
ബിജെപി സംസ്ഥാന വൈസ് പ്രസിഡന്റ് പി.വി. രാജന്‍ അദ്ധ്യക്ഷത വഹിച്ചു. എ.പി. അബ്ദുള്ളക്കുട്ടി, ബിജെപി സംസ്ഥാന ജനറല്‍ സെക്രട്ടറി അഡ്വ. പി. സുധീര്‍, മഹിളാ മോര്‍ച്ച സംസ്ഥാന അദ്ധ്യക്ഷ നിവേദിത സുബ്രമണ്യന്‍, കേരളാ കാമരാജ് കോണ്‍ഗ്രസ് സംസ്ഥാന ജനറല്‍ സെക്രട്ടറി സന്തോഷ് കാളിയത്ത്, ബിജെപി പാലക്കാട് മേഖലാ അദ്ധ്യക്ഷന്‍ ഉണ്ണികൃഷ്ണന്‍, ജില്ലാ പ്രസിഡന്റ് രവി തേലത്ത്, ബിജെപി ജില്ലാ ജനറല്‍ സെക്രട്ടറിമാരായ രശ്മില്‍ നാഥ്, ബി. രതീഷ്, സോഷ്യലിസ്റ്റ് ജനതാദള്‍ സംസ്ഥാന പ്രസിഡന്റ് വി.വി. രാജേന്ദ്രന്‍, നാഷണലിസ്റ്റ് കേരളാ കോണ്‍ഗ്രസ് സംസ്ഥാന ജനറല്‍ സെക്രട്ടറി എം.എന്‍. ഗിരി തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: