വാരണാസി: കാശിയിലെ എന്റെ കുട്ടികളെ കോണ്‍ഗ്രസിലെ യുവരാജാവ് കുടിയന്മാര്‍ എന്ന് വിളിച്ചു അധിക്ഷേപിച്ചുവെന്ന് പ്രധാനമന്ത്രി മോദി. തന്റെ ലോക് സഭാ മണ്ഡലമായ വാരണാസിയില്‍ പൊതുയോഗത്തെ അഭിസംബോധന ചെയ്യവേയാണ് മോദി രാഹുല്‍ ഗാന്ധിയ്‌ക്കെതിരെ ആഞ്ഞടിച്ചത്.
കഴിഞ്ഞ ദിവസം രാഹുല്‍ ഗാന്ധി നടത്തിയ വിവാദപരാമര്‍ശത്തിന് മറുപടി പറയുകയായിരുന്നു മോദി. വാരണാസിയില്‍ ചെന്നപ്പോള്‍ നിരവധി പേര് കുടിച്ചുന്മത്തരായി റോഡില്‍ കിടക്കുന്നത് കണ്ടു എന്നായിരുന്നു രാഹുല്‍ ഗാന്ധി നടത്തിയ പരാമര്‍ശം.
“ബുദ്ധിസ്ഥിരതയില്ലാത്തവര്‍ക്ക് മാത്രമാണ് എന്റെ കുട്ടികളെ കുടിയന്മാര്‍ എന്ന് വിളിക്കാന്‍ കഴിയൂ. വാരണാസിയിലെ യുവാക്കളെ അവരുടെ മണ്ണില്‍വെച്ചാണ് കോണ്‍ഗ്രസിന്റെ യുവരാജാവ് അധിക്ഷേപിച്ചത്. രണ്ടു പതിറ്റാണ്ടായി അവര്‍ മോദിയെ അധിക്ഷേപിക്കുന്നു. ഇപ്പോള്‍ അവര്‍ അവരുടെ നിരാശ കാരണം യുപിയിലെ യുവാക്കളേയും അധിക്ഷേപിക്കുന്നു. എന്തൊരു ഭാഷയാണ് അവര്‍ ഉപയോഗിക്കുന്നത്.? “- മോദി ചോദിച്ചു.
ഉത്തര്‍പ്രദേശിലെ യുവാക്കളെ അപമാനിച്ച ഇന്‍ഡി സഖ്യത്തെ വെറുതെ വിടില്ല. അഴിമതിയും സ്വജനപക്ഷപാതവും കുടുംബരാഷ്‌ട്രീയവും കാരണം എത്രയോ കാലമായി ഉത്തര്‍പ്രദേശിലെ വികസനം മുരടിക്കുകയായിരുന്നു. – മോദി പറഞ്ഞു.
പ്രതികരിക്കാൻ ഇവിടെ എഴുതുക: