പ്രൈം വോളിബോള്‍ ലീഗ്: ബെംഗളൂരുവിനെ തകര്‍ത്ത് മുംബൈ മെറ്റിയോഴ്‌സ് വിജയവഴിയില്‍

ചെന്നൈ: പ്രൈം വോളിബോള്‍ ലീഗിന്റെ മൂന്നാം സീസണില്‍ പിന്നിട്ടുനിന്നശേഷം ബംഗളൂരു ടോര്‍പിഡോസിനെ കീഴടക്കി മുംബൈ മെറ്റിയോഴ്‌സ്. ചെന്നൈ ജവഹര്‍ലാല്‍ നെഹ്‌റു ഇന്‍ഡോര്‍ സ്റ്റേഡിയത്തില്‍ നടന്ന കളിയില്‍ അഞ്ച് സെറ്റ് പോരാട്ടത്തിലായിരുന്നു മുംബൈയുടെ ജയം. സ്‌കോര്‍: 8-15, 15-12, 15-10, 11-15, 15-9. അമിത് ഗുലിയ ആണ് കളിയിലെ താരം.

കഴിഞ്ഞ കളിയില്‍ ദല്‍ഹി തൂഫാന്‍സിനോടേറ്റ ഞെട്ടിക്കുന്ന തോല്‍വിയില്‍നിന്ന് പാഠം പഠിച്ച പോലെയായിരുന്നു ബംഗളൂരുവിന്റെ തുടക്കം. സേതുവിലൂടെ അവര്‍ ഒന്നാന്തരം സെര്‍വുകളുമായി കളംപിടിച്ചു. എന്നാല്‍ ശുഭം ചൗധരി ആക്രമണം തുടങ്ങിയതോടെ മുംബൈ കളിയിലേക്ക് തിരിച്ചുവന്നു. നിര്‍ണായക സെറ്റില്‍ അമിത് മികച്ച പ്രകടനം പുറത്തെടുത്തതോടെ മുംബൈ ജയംകുറിച്ചു. അവസാന കളിയില്‍ ഹൈദരാബാദ് ബ്ലാക്‌ഹോക്‌സിനോട് മുംബൈ തോറ്റിരുന്നു. സീസണിലെ രണ്ടാം ജയമാണ് അവര്‍ക്ക്.

ബംഗളൂരു മൂന്ന് കളിയില്‍ രണ്ടിലും തോറ്റു. ഇന്ന് രണ്ട് മത്സരങ്ങളാണ്. ആദ്യ കളിയില്‍ കൊല്‍ക്കത്ത തണ്ടര്‍ബോള്‍ട്‌സ് ചെന്നൈ ബ്ലിറ്റ്‌സിനെ നേരിടും. വൈകിട്ട് 6.30നാണ് കളി. രാത്രി 8.30ന് നടക്കുന്ന കളിയില്‍ അഹമ്മദാബാദ് ഡിഫന്‍ഡേഴ്‌സ് ഹൈദരാബാദ് ബ്ലാക് ഹോക്‌സിനെ നേരിടും.