ന്യൂദല്‍ഹി: രാജ്യത്തു നിന്ന് സവാള കയറ്റുമതി ചെയ്യുന്നതിനുള്ള വിലക്ക് മാര്‍ച്ച് 31 വരെ തുടരുമെന്ന് കേന്ദ്രം. വിലക്കയറ്റം നിയന്ത്രിച്ച് ആഭ്യന്തര ആവശ്യം ഉറപ്പാക്കുന്നതിനായാണ് സവാള കയറ്റുമതി കേന്ദ്ര സര്‍ക്കാര്‍ വിലക്കിയത്. മുന്‍പുണ്ടായിരുന്ന പ്രഖ്യാപനത്തില്‍ മാറ്റമൊന്നുമുണ്ടായിട്ടില്ലെന്നും ഉപഭോക്തൃ കാര്യാലയം മന്ത്രാലയം സെക്രട്ടറി രോഹിത് കുമാര്‍ സിങ് അറിയിച്ചു.
സവാള കയറ്റുമതി നിരോധനം പിന്‍വലിച്ചുവെന്ന റിപ്പോര്‍ട്ടുകള്‍ പ്രചരിക്കവെയാണ് പ്രഖ്യാപനമാവര്‍ത്തിച്ച് കേന്ദ്രം രംഗത്തെത്തിയത്. രാജ്യത്ത് സവാളയുടെ ലഭ്യത ഉറപ്പുവരുത്തുന്നതിനാണ് മുന്‍ഗണനയെന്നും രോഹിത് കുമാര്‍ സിങ് പറഞ്ഞു. കഴിഞ്ഞ ഡിസംബര്‍ എട്ടിനാണ് സവാള കയറ്റുമതി മാര്‍ച്ച് 31 വരെ നിരോധിച്ചുവെന്ന പ്രഖ്യാപനമുണ്ടായത്.
നിരോധനം പിന്‍വലിച്ചുവെന്ന വ്യാജ വാര്‍ത്ത പ്രചരിച്ചതിന് പിന്നാലെ രാജ്യത്തെ ഏറ്റവും വലിയ സവാള മൊത്തക്കച്ചവട മാര്‍ക്കറ്റില്‍ സവാളയുടെ വില 41 ശതമാനം വര്‍ധിച്ചു. ഫെബ്രുവരി 17ന് ക്വിന്റലിന് 1,280 രൂപയായിരുന്നത് 19ന് 1,800 രൂപയായാണ് വര്‍ധിച്ചത്.
പ്രതികരിക്കാൻ ഇവിടെ എഴുതുക: