കൊച്ചി: മസാല ബോണ്ട് കേസിൽ മുൻ ധനമന്ത്രി തോമസ് ഐസക് ഹാജരായേ മതിയാകൂവെന്ന് ഇഡി. എന്തൊക്കെയാ സംഭവിച്ചതെന്ന് ഐസക്കിനറിയാം. മസാല ബോണ്ടിൽ ഫണ്ട് എങ്ങനെ വിനിയോഗിച്ചു എന്നറിയുന്നത് തോമസ് ഐസകിനാണ്. അറസ്റ്റുൾപ്പെടെ ഉണ്ടാകില്ലെന്നും ഇഡി ഹൈക്കോടതിയെ അറിയിച്ചു. എന്നാൽ ഐസകിന്റെ ആവശ്യത്തിൽ ഹൈക്കോടതി ഇടക്കാല ഉത്തരവിട്ടില്ല.
അതേസമയം ഇഡിക്ക് മുന്നിൽ ഹാജരാകാൻ തയാറാണെന്ന് കിഫ്ബി അറിയിച്ചു. ഇഡി ആവശ്യപ്പെട്ട രേഖകൾ കൊടുക്കാൻ തയാറാണെന്നും കിഫ്ബി കോടതിയെ അറിയിച്ചു. തത്കാലം കിഫ്ബിയുടെ ഫിനാൻസ് ഡിജിഎം ഹാജരാകുന്നതിൽ എതിർപ്പില്ലെന്ന് ഇഡി നിലപാടറിയിച്ചു. ഈ മാസം 27,28 തിയതികളിൽ ഡിജിഎം ഇഡിക്ക് മുന്നില് ഹാജരാകും. ഈ ഘട്ടത്തിൽ അറസ്റ്റ് ഉണ്ടാകില്ലെന്ന ഇഡിയുടെ ഉറപ്പ് കോടതി രേഖപ്പെടുത്തി.
മുൻ ധനമന്ത്രി തോമസ് ഐസക്, കിഫ്ബി സിഇഒ കെ.എം എബ്രഹാം എന്നിവർക്കാണ് ചോദ്യം ചെയ്യലിന് ഹാജരാകാൻ അവശ്യപ്പെട്ട് ഇഡി സമൻസ് നൽകിയത്. ഇത് ചോദ്യം ചെയ്തുകൊണ്ടുള്ള ഹർജി പരിഗണിക്കുകയായിരുന്നു കോടതി.
സിഇഒയ്ക്ക് ഹാജരാകാൻ കഴിയില്ലെന്നും പകരം ഫിനാൻസ് ഡിജിഎമ്മും മാനേജർമാരും ചോദ്യം ചെയ്യലിന് ഹാജരാകാൻ തയാറാണെന്നും കിഫ്ബി കോടതിയെ അറിയിക്കുകയായിരുന്നു. ചോദ്യം ചെയ്യൽ വീഡിയോയിൽ ചിത്രീകരിക്കണമെന്ന് കോടതി നിര്ദേശിച്ചു. ഇഡി ആവശ്യപ്പെട്ട രേഖകൾ കൊടുക്കാൻ തയ്യാറാണെന്നും കിഫ്ബി കോടതിയില് വ്യക്തമാക്കി. അതേസമയം ഇഡി സമൻസ് നിയമവിരുദ്ധമാണെന്ന് തോമസ് ഐസക് കോടതിയിൽ ആവർത്തിച്ചു. ഇഡിക്ക് മുന്നിൽ ഹാജരാകാൻ കഴിയില്ലെന്നും ഐസക് നിലപാടെടുത്തു.
ഇ.ഡിയുടെ റിപ്പോർട്ടിനായി ഹർജികൾ മാർച്ച് 7 ലേക്ക് മാറ്റി.
