ന്യൂദല്ഹി: പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സര്ക്കാര് ഓരോ ഭാരതീയന്റെയും സ്വപ്നങ്ങള് സാക്ഷാത്കരിക്കുന്നതായി ബിജെപി ദേശീയ അധ്യക്ഷന് ജെ.പി. നദ്ദ. ദല്ഹി ഭാരതമണ്ഡപത്തില് ബിജെപി ദേശീയ കണ്വെന്ഷന് ഉദ്ഘാടനം ചെയ്യുകയായിരുന്നു അദ്ദേഹം.
അഭൂതപൂര്വമായ പരിവര്ത്തനമാണ് ഭാരതം കാണുന്നത്. പ്രധാനമന്ത്രി നരേന്ദ്ര മോദിയുടെ നേതൃത്വത്തില് ഭാരതം ഭൂമിയില് മാത്രമല്ല, ആകാശത്തും തിളങ്ങുന്നു. മംഗള്യാനില് നിന്ന് ചന്ദ്രയാന് മൂന്നിലേക്കുള്ള യാത്ര, വിജയകരമായ ജി 20 അധ്യക്ഷത, 2023നെ അന്താരാഷ്ട്ര മില്ലറ്റ് വര്ഷമാക്കിയത് ഇതെല്ലാം സുപ്രധാനനേട്ടങ്ങളാണ്. പാവപ്പെട്ടവരും കര്ഷകരും വനിതകളും യുവാക്കളുമാണ് പ്രധാനമന്ത്രിയുടെ പ്രധാനശ്രദ്ധാകേന്ദ്രം.
പത്തുവര്ഷത്തിനുള്ളില് 25 കോടിയോളം ജനങ്ങളെ പട്ടിണിയില് നിന്ന് കരകയറ്റി. അവര്ക്ക് പറക്കാന് പുതിയ ചിറകുകള് നല്കി. 80 കോടിയിലധികം ഗുണഭോക്താക്കള്ക്ക് സൗജന്യ ഭക്ഷ്യധാന്യങ്ങള് ലഭിക്കുന്നു. ഈ കഥ ഇവിടെ അവസാനിക്കുന്നില്ല. ആരോഗ്യം, അടിസ്ഥാനസൗകര്യങ്ങള്, വിദ്യാഭ്യാസം, തൊഴില് എന്നിങ്ങനെ എല്ലാ മേഖലയിലും മോദിയുടെ നേതൃത്വം ഓരോ ഭാരതീയന്റെയും സ്വപ്നങ്ങള് സാക്ഷാത്കരിക്കുന്നു. രാജ്യത്തിന്റെ രാഷ്ട്രീയസംസ്കാരത്തെ തന്നെ മോദി മാറ്റിമറിച്ചു, നദ്ദ പറഞ്ഞു.
രാഷ്ട്രീയത്തിലും പാര്ട്ടിയിലും സമൂഹത്തിലും പുതിയ മാനങ്ങള് സൃഷ്ടിച്ച നേതൃത്വത്തിന് പ്രധാനമന്ത്രി നരേന്ദ്ര മോദിയെ അഭിനന്ദിക്കുന്നു. ഭൂതകാലത്തില് നാം വിജയിച്ചു. ഭാവിയിലും വിജയിക്കും. ഭാരതീയ ജനസംഘത്തിന്റെയും ബിജെപിയുടെയും ഏഴു പതിറ്റാണ്ടുകളില്, നാം പല കാലഘട്ടങ്ങള് കണ്ടു. സമരത്തിന്റെ കാലം,. അവഗണനയുടെ കാലം. അടിയന്തരാവസ്ഥ, ജയിക്കുകയും തേ ാല്ക്കുകയും ചെയ്ത തെരഞ്ഞെടുപ്പുകള്… ഈ ദശകം നേട്ടങ്ങളാല് നിറഞ്ഞതാണെന്നതില് സന്തോഷമുണ്ട്. പ്രവര്ത്തകരുടെ ശക്തിയിലും കഴിവിലും ഉറച്ച വിശ്വാസമുണ്ട്. ബൂത്തുകള് കൂടുതല് ശക്തമാക്കണം. ഇത്തവണ എന്ഡിഎ 400 കടക്കുന്നുവെന്ന് ഉറപ്പാക്കാന് എല്ലാ ഊര്ജവും വിനിയോഗിക്കണമെന്നും നദ്ദ ആഹ്വാനം ചെയ്തു.
ജന്മഭൂമി ഓണ്ലൈന്