തിരുവനന്തപുരം: വന്യമൃഗങ്ങള് ജനവാസ മേഖലയില് വരുന്നത് കണ്ടെത്താന് 250 പുതിയ ക്യാമറകള് കൂടി സ്ഥാപിക്കാന് തീരുമാനം. വയനാട്ടിലെ വന്യജീവി ആക്രമണത്തെ തുടര്ന്നുണ്ടായ സ്ഥിതിഗതികള് വിലയിരുത്താന് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന ഉന്നതതല യോഗത്തിലാണ് തീരുമാനം. വനം, പോലീസ്, റവന്യു തുടങ്ങിയ വകുപ്പുകളുടെ ഏകോപനം ഉറപ്പാക്കും. അതിര്ത്തി സംസ്ഥാനങ്ങളുമായുള്ള ഏകോപനയോഗത്തിന് ശേഷം കര്ണാടകയില് നിന്ന് 25 വനംവകുപ്പ് ഉദേ്യാഗസ്ഥര് ആനയെ പിടികൂടാനുള്ള സംഘത്തോടൊപ്പമുണ്ട്. ആവശ്യമുള്ള ഇടങ്ങളില് പോലിസ്, വനംവകുപ്പ് ജീവനക്കാരുടെ സാന്നിധ്യം ശക്തിപ്പെടുത്താനും യോഗത്തില് തീരുമാനമായി.
ജനങ്ങള്ക്കിടയില് ശക്തമായ ബോധവത്ക്കരണം നടത്താനുള്ള ഇടപെടല് ഉണ്ടാകും. മൈക്ക് പ്രചരണവും ലോക്കല് പോലിസ് സ്റ്റേഷന് വഴിയുള്ള പ്രചരണവും കൂടുതല് ശക്തമാക്കും. പ്രശ്നങ്ങള് ചര്ച്ച ചെയ്യാന് മന്ത്രിമാരുടെ നേതൃത്വത്തില് ഉന്നതതലയോഗം വിളിക്കാന് മുഖ്യമന്ത്രി നിര്ദേശിച്ചു. റവന്യു, വനം, തദ്ദേശസ്വയംഭരണം എന്നീ വകുപ്പ് മന്ത്രിമാരുടെ നേതൃത്വത്തില് ഈമാസം 20ന് വയനാട് കളക്ട്രേറ്റില് ചേരും. ജില്ലയിലെ ജനപ്രതിനിധികളും ഉദ്യോഗസ്ഥരും പങ്കെടുക്കും. യോഗത്തില് ചീഫ് സെക്രട്ടറി ഡോ. വേണു വി., സംസ്ഥാന പോലിസ് മേധാവി ഷെയ്ഖ് ദര്വേഷ് സാഹിബ്, എഡിജിപിമാരായ മനോജ് എബ്രഹം, എം.ആര്. അജിത്കുമാര്, വനം വകുപ്പ് അഡീ. ചീഫ് സെക്രട്ടറി കെ.ആര്. ജ്യോതിലാല്, വനം വകുപ്പ് മേധാവി ഗംഗ സിങ്, അഡീ. പ്രിന്സിപ്പല് ചീഫ് കണ്സര്വേറ്റര് പി. പുകഴേന്തി, ചീഫ് വൈല്ഡ് ലൈഫ് വാര്ഡന് ജയപ്രസാദ്, റവന്യു പ്രിന്സിപ്പല് സെക്രട്ടറി ടിങ്കു ബിസ്വാള് എന്നിവര് പങ്കെടുത്തു.
