വയനാട്: വന്യജീവി ആക്രമണത്തില് തുടര്ച്ചയായി മനുഷ്യജീവന് പൊലിയുന്നതില് പ്രതിഷേധിച്ച് വയനാട്ടില് ശനിയാഴ്ച ഹര്ത്താല്. യു ഡി എഫും എല് ഡി എഫുമാണ് ഹര്ത്താലിന് ആഹ്വാനം ചെയ്തത്.
പുലര്ച്ചെ ആറ് മുതല് വൈകിട്ട് ആറ് വരെയാണ് ഹര്ത്താല്. അവശ്യസര്വീസുകളെ ഹര്ത്താലില് നിന്നും ഒഴിവാക്കിയിട്ടുണ്ട്.
വയനാട്ടില് മൂന്നാഴ്ചയ്ക്കിടെ മൂന്ന് പേരാണ് വന്യജീവി ആക്രമണത്തില് മരിച്ചത്. വന്യമൃഗ ശല്യത്തിന് ശാശ്വത പരിഹാരം കാണണമെന്നും കേന്ദ്ര – സംസ്ഥാന സര്ക്കാരുകള് അടിയന്തിരമായി ഇടപെടണമെന്നും ആവശ്യപ്പെട്ടാണ് എല്ഡിഎഫ് ഹര്ത്താലിന് ആഹ്വാനം ചെയ്തത് .
ഇന്ന് രാവിലെ ഒമ്പതുമണിയോടെയാണ് കുറുവാ ദ്വീപ് വനസംരക്ഷണ സമിതി (വി.എസ്.എസ്) ജീവനക്കാരനായ പോള് ജോലിക്കായി പോകുന്ന വഴി ആനക്കൂട്ടത്തിന് മുന്നില്പ്പെട്ടത്. ഗുരുതര പരിക്കേറ്റ പോള് കോഴിക്കോട് മെഡിക്കല് കോളേജ് ആശുപത്രിയിലാണ് മരിച്ചത്.
ഈ മാസം പത്തിന് മാനന്തവാടി പടമല സ്വദേശി അജീഷ് കാട്ടാന ആക്രമണത്തില് കൊല്ലപ്പെട്ടിരുന്നു. അജീഷിനെ ആക്രമിച്ച ബേലൂര് മഖ്നയെ ഇനിയും പിടികൂടാനായിട്ടില്ല. ജനുവരി 30ന് തോല്പ്പെട്ടി സ്വദേശി ലക്ഷ്മണന് കാട്ടാന ആക്രമണത്തില് കൊല്ലപ്പെട്ടിരുന്നു.
