ഓടിക്കൊണ്ടിരുന്ന ബൈക്കിൽ നിന്ന് തീ ഉയർന്നു; യാത്രക്കാരൻ രക്ഷപ്പെട്ടത് തലനാരിഴയ്‌ക്ക്

ഇടുക്കി: ഓടിക്കൊണ്ടിരുന്ന ബൈക്കിന് തീപിടിച്ചു. ബൈക്ക് യാത്രികൻ രക്ഷപ്പെട്ടത് തലനാരിഴയ്‌ക്കെന്ന് ദൃക്‌സാക്ഷികൾ പറയുന്നു. മൂന്നാർ ബസ് സ്റ്റാൻഡിന് സമീപം ഇന്നലെ രാവിലെ 11 മണിയോടെയായിരുന്നു സംഭവം.

കോഴിക്കോട് നിന്നും മൂന്നാറിയിൽ എത്തിയ വിനോദ സഞ്ചാരികളുടെ ബൈക്കിനാണ് തീപിടിച്ചത്. സംഭവത്തിൽ ബൈക്ക് യാത്രികനായ യുവാവ് അത്ഭുതകരമായി രക്ഷപ്പെട്ടു. പുക ഉയരുന്നത് ശ്രദ്ധയിൽപ്പെട്ട യുവാവ് ബൈക്ക് നിർത്തി പെട്ടെന്ന് ഇറങ്ങി.

പിന്നാലെ പെട്രോൾ ടാങ്കിന് സമീപത്ത് നിന്നും തീ ഉയരുകയായിരുന്നു. സമീപത്തുണ്ടായിരുന്ന കച്ചവടക്കാരും പ്രദേശവാസികളും ചേർന്ന് വാഹനത്തിൽ നിന്നും ഉയർന്ന തീയണച്ചു. ബൈക്കിൽ നിന്നും തീ ഉയർന്നതിന്റെ കാരണം വ്യക്തമല്ല.