മാനന്തവാടി: കാട്ടാന ആക്രമണത്തില് കൊല്ലപ്പെട്ട പടമല പനച്ചില് അജീഷിന്റെ കുടുംബത്തിന്റെ സംരക്ഷണം സംസ്ഥാന സര്ക്കാര് ഏറ്റെടുക്കണമെന്ന് ബിജെപി ദേശീയ നിര്വാഹ സമിതി അംഗം പി.കെ. കൃഷ്ണദാസ്. അജിഷിന്റെ വീട് സന്ദര്ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ജനങ്ങളുടെ ജീവന് ഭീഷണിയാവുന്ന മൃഗങ്ങളെ വെടിവെച്ചു കൊല്ലാന് നിയമമുണ്ട്. ഈ നിയമം പാലിക്കാന് ഉദ്യോഗസ്ഥര് തയാറാകണം. വന്യമൃഗ ശല്യം പ്രതിരോധിക്കാന് താല്ക്കാലിക സംവിധാനത്തിനുപകരം സ്ഥിരം സംവിധാനം ഒരുക്കണം. കേന്ദ്രസര്ക്കാരിന്റെ എന്തെങ്കിലും സഹായം ആവശ്യമെങ്കില് സംസ്ഥാന സര്ക്കാര് ആവശ്യപ്പെട്ടാല് നല്കാന് കേന്ദ്രസര്ക്കാരില് സമ്മര്ദം ചെലുത്തും. ഈ വിഷയത്തില് സംസ്ഥാന സര്ക്കാരിന് ചെയ്യാന് പറ്റുന്നതെല്ലാം യുദ്ധകാലാടിസ്ഥാനത്തില് ചെയ്യണം.
അജീഷിന്റെ കുടുംബത്തെ സര്ക്കാര് ഏറ്റെടുക്കണമെന്നും കുടുംബത്തിന് 50 ലക്ഷം രൂപ നഷ്ടപരിഹാരം നല്കണമെന്നും അദ്ദേഹം ആവശ്യപ്പെട്ടു. ബിജെപി ജില്ലാ പ്രസിഡന്റ് കെ.പി. മധു തുടങ്ങിയ നേതാക്കള് അദ്ദേഹത്തോടൊപ്പം ഉണ്ടായിരുന്നു.
