ന്യൂദല്‍ഹി: ചൈനയുമായുള്ള ഇടപാടുകളില്‍ കൈപൊള്ളിയ ശ്രീലങ്കയ്‌ക്ക് പക്ഷെ മോദിയെയും ഇന്ത്യയെയും വിശ്വാസമാണ്. കടം നല്‍കി സ്വത്ത് പിടിച്ചെടുക്കുന്ന ചൈനയുടെ കുബുദ്ധി ഇന്ത്യയ്‌ക്കില്ലെന്ന വിശ്വാസത്താലാണ് ശ്രീലങ്കയിലെ മൂന്ന് വിമാനത്താവളങ്ങള്‍ ഏറ്റെടുക്കണമെന്ന അഭ്യര്‍ത്ഥനയുമായി ശ്രീലങ്ക അദാനിയെ സമീപിച്ചിരിക്കുന്നത്. ഇക്കാര്യം ഇന്ത്യ സന്ദര്‍ശിച്ച ശ്രീലങ്കയുടെ വിനോദസഞ്ചാരവകുപ്പ് മന്ത്രി ഹരിന്‍ ഫെര്‍ണാണ്ടോ ആണ് സ്ഥിരീകരിച്ചത്.
ഇതു സംബന്ധിച്ച് അദാനിയുമായി ചര്‍ച്ച നടത്തിയതായും ഹരിന്‍ ഫെര്‍ണാണ്ടോ പറഞ്ഞു. കൊളംബോയിലെ സുപ്രസിദ്ധമായ ബണ്ഡാരനായകെ അന്താരാഷ്‌ട്ര വിമാനത്താവളം ഉള്‍പ്പെടെ ഏറ്റെടുത്ത് നടത്താനാണ് അദാനിയോട് ശ്രീലങ്ക ആവശ്യപ്പെടുന്നത്. ശ്രീലങ്കയുടെ നാലാമത്തെ പ്രധാനമന്ത്രിയായിരുന്ന സോളമന്‍ ബണ്ഡാരനായകെയുടെ പേരില്‍ 1970ല്‍ ആരംഭിച്ച ഈ വിമാനത്താവളം ശ്രീലങ്കയിലേക്കുള്ള അന്തരാഷ്‌ട്ര പ്രവേശനകവാടമായാണ് അറിയപ്പെടുന്നത്.
കൊളംബോയില്‍ തന്നെയുള്ള രത്മലാനാ , മറ്റാല എന്നിവയാണ് മറ്റ് രണ്ട് വിമാനത്താവളങ്ങള്‍. ഇതില്‍ രത്മലാന ലോകത്തിലെ ഏറ്റവും ശൂന്യമായ വിമാനത്താവളം എന്നാണ് ഫോബ്സ് മാസിക വിശേഷിപ്പിച്ചത്. ഏറ്റവും കുറവ് വിമാനങ്ങള്‍ പ്രവര്‍ത്തിക്കുന്ന വിമാനത്താവളമാണിത്.
സാമ്പത്തികപ്രതിസന്ധിയ്‌ക്ക് ശേഷം ശ്രീലങ്ക ഉയിര്‍ത്തെഴുന്നേല്‍പിന്റെ പാതയിലാണ്. പ്രധാനമായും ശ്രീലങ്കയ്‌ക്ക് വരുമാനം നേടിക്കൊടുക്കുന്ന ടൂറിസം വീണ്ടും വിപുലമാക്കുകയാണ് ലക്ഷ്യം. പക്ഷെ കയ്യില്‍ പണമില്ല. ചൈനയുടെ മുന്‍പില്‍ കൈനീട്ടാന്‍ വയ്യ. ഒരിയ്‌ക്കല്‍ ചൈനയുടെ പണം വാങ്ങിയതിന്റെ മുറിവ് മാറിയിട്ടില്ല. 450 കോടി ഡോളര്‍ ആണ് അന്ന് ചൈനയില്‍ നിന്നും കടമായി വാങ്ങിയത്. തിരിച്ചടവ് മുടങ്ങിയപ്പോള്‍ ഹംബന്‍ടോട്ട എന്ന പ്രധാനതുറമുഖം ചൈനയുടെ കൂടി സംയുക്ത ഉടമസ്ഥതയിലാണ്. 99 വര്‍ഷത്തേക്ക് ഇത് ചൈനയ്‌ക്ക് വാടകയ്‌ക്ക് കൊടുക്കേണ്ടിവന്നു. എന്നാല്‍ ഇന്ത്യയും മോദിയും ഇത്തരം ചതികള്‍ ചെയ്യില്ലെന്ന വിശ്വാസത്തിലാണ് ശ്രീലങ്ക അവരുടെ വിമാനത്താവളങ്ങള്‍ ഏറ്റെടുത്ത് നടത്താന്‍ അദാനിയെ സമീപിക്കുന്നത്.
പ്രതികരിക്കാൻ ഇവിടെ എഴുതുക: