ന്യൂദല്ഹി: ദ്വിദിന യുഎഇ സന്ദര്ശനത്തിനൊരുങ്ങി പ്രധാനമന്ത്രി നരേന്ദ്ര മോദി. ഈ മാസം 13, 14 തീയതികളിലാണ് അദ്ദേഹം യുഎഇ സന്ദര്ശിക്കുന്നത്. 14ന് അബുദാബിയിലെ ആദ്യ ഹിന്ദു ക്ഷേത്രമായ ബാപ്സ് മന്ദിര് പ്രധാനമന്ത്രി ഉദ്ഘാടനം ചെയ്യും.
സായിദ് സ്പോര്ട്സ് സിറ്റിയില് നടക്കുന്ന പരിപാടിയില് യുഎഇയിലെ ഇന്ത്യന് സമൂഹത്തെയും അദ്ദേഹം അഭിസംബോധന ചെയ്യും. യുഎഇ പ്രസിഡന്റ് ഷെയ്ഖ് മുഹമ്മദ് ബിന് സായിദ് അല് നഹ്യാനുമായി പ്രധാനമന്ത്രി ഉഭയകക്ഷി ചര്ച്ച നടത്തുമെന്നും 2024ലെ വേള്ഡ് ഗവണ്മെന്റ് ഉച്ചകോടിയില് പങ്കെടുക്കുമെന്നും വിദേശകാര്യ മന്ത്രാലയം അറിയിച്ചു.
2015-ന് ശേഷമുള്ള പ്രധാനമന്ത്രിയുടെ എട്ടാമത്തെ യുഎഇ സന്ദര്ശനമാണിത്. സന്ദര്ശന വേളയില് പ്രധാനമന്ത്രി യുഎഇ പ്രസിഡന്റ് ഷെയ്ഖ് മുഹമ്മദ് ബിന് സായിദ് അല് നഹ്യാനുമായി ഉഭയകക്ഷി ചര്ച്ച നടത്തും. ഇരുരാജ്യങ്ങളും തമ്മിലുള്ള നയതന്ത്ര ബന്ധം കൂടുതല് ദൃഢമാക്കാനും ശക്തിപ്പെടുത്താനുമുള്ള കാര്യങ്ങള് ചര്ച്ച ചെയ്യുമെന്ന് വിദേശകാര്യ മന്ത്രാലയം അറിയിച്ചു.
യുഎഇ വൈസ് പ്രസിഡന്റ് ഷെയ്ഖ് മുഹമ്മദ് ബിന് റാഷിദ് അല് മക്തൂമുമായും പ്രധാനമന്ത്രി കൂടിക്കാഴ്ച നടത്തും. അദ്ദേഹത്തിന്റെ ക്ഷണപ്രകാരമാണ് പ്രധാനമന്ത്രി ദുബായില് നടക്കുന്ന വേള്ഡ് ഗവണ്മെന്റ് ഉച്ചകോടിയില് വിശിഷ്ടാതിഥിയായി പങ്കെടുക്കുന്നത്. ഉച്ചകോടിയില് പ്രധാനമന്ത്രി മുഖ്യപ്രഭാഷണം നടത്തും.
