കശ്മീരിന്റെ പ്രത്യേക പദവി നരേന്ദ്രമോദിയുടെ നേതൃത്തവത്തിലുളള കേന്ദ്രസര്ക്കാര് സ്വീകരിച്ച മുന്നൊരുക്കങ്ങളും ഇതിനായി രഹസ്യമായി താഴ്വരയില് പ്രവര്ത്തിച്ച സുരക്ഷാസേനയിലെ പ്രത്യേക ടീമിന്റെയും കഥ പറയുന്ന ‘ആര്ട്ടിക്കിള് 370’ സിനിമയുടെ ട്രെയിലര് വൈറല്. 12 മില്ല്യണ് (ഒരു കോടി 20 ലക്ഷം) പേര് കണ്ട വീഡിയോയെ സംബന്ധിച്ച് ഇതിനോടകം തന്നെ സമൂഹ മാധ്യമങ്ങളില് ചര്ച്ച ആരംഭിച്ചിട്ടുണ്ട്.
യഥാര്ത്ഥ സംഭവങ്ങള് കൂട്ടിയിണക്കിക്കൊണ്ടുള്ള ചിത്രത്തില് യാമിഗൗതമും പ്രിയാ മണിയുമാണ് കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്നത്. ‘ഉറി ദ സര്ജിക്കല് സ്ട്രൈക്ക്’ സിനിമയുടെ സംവിധായകന് ആദിത്യ ധാര്, മൊണാല് താക്കര് എന്നിവര് ചേര്ന്നാണ് സിനിമയുടെ കഥയും തിരക്കഥയും ഒരുക്കിയിരിക്കുന്നത്.
ചിത്രത്തിലെ കാസ്റ്റിങ് സോഷ്യല് മീഡിയയില് വലിയ ശ്രദ്ധയാണ് നേടിയത്. പ്രധാനമന്ത്രി നരേന്ദ്രമോദി, ആഭ്യന്തരമന്ത്രി അമിത് ഷാ എന്നിവരുടെ കഥാപാത്രങ്ങളെ അവതരിപ്പിച്ചിരിക്കുന്ന നടന്മാരുടെ മേക്കോവറിനെ നിരവധിപേരാണ് പ്രശംസിച്ച് രംഗത്തുവന്നിരിക്കുന്നത്. ഇതില് പ്രധാനമന്ത്രിയുടെ റോള് അവതരിപ്പിക്കുന്നത് 80 കളിലും 90 കളിലും ദൂരദര്ശനിലൂടെ തരംഗമായിമാറിയ രാമായണം ടെലിസീരിയലില് ശ്രീരാമന്റെ വേഷം അഭിനയിച്ച അരുണ് ഗോവിലാണ്.
ചിത്രത്തിലെ ഫസ്റ്റ് ലുക്ക് പോസ്റ്റര് പുറത്തുവന്നപ്പോള് തന്നെ ആരാധകരുടെ ഭാഗത്തുനിന്നും മികച്ച പ്രതികരണമാണ് മേക്കോവറിന് ലഭിച്ചത്. ചിത്രത്തില് ആഭ്യന്തരമന്ത്രി അമിത്ഷായെ അവതരിപ്പിക്കുന്നത് പ്രശസ്ത ബോളിവുഡ് നടന് കിരണ് കര്മകാരുമാണ്. ജ്യോതി ദേശ്പാണ്ഡെയ്ക്കൊപ്പം ആദിത്യ ധാര്, ലോകേഷ് ധാര് എന്നിവര് ചേര്ന്നാണ് നിര്മ്മിച്ച സിനിമയ്ക്ക് ശാശ്വത് സച്ദേവാണ് സംഗീതം നല്കിയിരിക്കുന്നത്. ഈ മാസം 23ന് സിനിമ തീയറ്ററുകളിലെത്തും.
