കഠിനംകുളം: സയന്‍സ് ഫെസ്റ്റിവലില്‍ വനിതാ വോളണ്ടിയറെ വീഡിയോകോള്‍ ചെയ്ത് അശ്ലീലം പറഞ്ഞ എഎസ്‌ഐയെ സ്ഥലംമാറ്റി. കഠിനംകുളം സ്‌റ്റേഷനിലെ എഎസ്‌ഐ ആയ എ.കെ. നസീമിനെയാണ് സ്ഥലംമാറ്റിയത്. കാഞ്ഞിരംകുളം സ്‌റ്റേഷനിലേക്കാണ് സ്ഥലംമാറ്റിയത്.
സയന്‍സ് ഫെസ്റ്റിവല്‍ വോളണ്ടിയറായ പെണ്‍കുട്ടിയില്‍ നിന്ന് ഫോണ്‍ നമ്പര്‍ വാങ്ങിയശേഷം രാത്രിയില്‍ വീഡിയോകോള്‍ വിളിച്ച് ശല്യപ്പെടുത്താന്‍ ആരംഭിച്ചതോടെ പെണ്‍കുട്ടി കോള്‍കട്ടു ചെയ്തു. വിളി നിരന്തരമായതോടെ ഇത് സംസാരിക്കാന്‍ മറ്റുള്ള വോളണ്ടിയര്‍മാരോടൊപ്പം പെണ്‍കുട്ടി എത്തിയപ്പോള്‍ ഇയാള്‍ വിദ്യാര്‍ഥികളെ ഭീഷണിപ്പെടുത്തുകയായിരുന്നു. തുടര്‍ന്ന് പ്രശ്‌നമാകുമെന്ന് മനസ്സിലായതോടെ ഇയാള്‍ ഓടി രക്ഷപ്പെട്ടു. സംഭവത്തെക്കുറിച്ച് ഫെസ്റ്റിവല്‍ അധികൃതര്‍ അറിയിച്ചതിനെ തുടര്‍ന്ന് ആറ്റിങ്ങല്‍ ഡിവൈഎസ്പി രാത്രി തന്നെ സ്ഥലത്തെത്തി അന്വേഷണം നടത്തി.
രക്ഷപ്പെട്ട് ഒളിവില്‍ പോയ എഎസ്‌ഐ സംഭവശേഷം ഡ്യൂട്ടിക്കും എത്തിയിരുന്നില്ല. തിരുവനന്തപുരം റൂറല്‍ എസ്പിക്ക് ആറ്റിങ്ങല്‍ ഡി വൈഎസ്പി നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് നടപടി. സംഭവത്തെക്കുറിച്ച് സ്‌പെഷ്യല്‍ ബ്രാഞ്ചും വിശദമായ റിപ്പോര്‍ട്ട് നല്‍കിയിട്ടുണ്ട്.
