കൊല്ലത്ത് വൻ കഞ്ചാവ് വേട്ട; പ്രതി പിടിയിൽ

കൊല്ലം: കൊല്ലത്ത് വൻ കഞ്ചാവ് വേട്ടയിൽ യുവാവ് പിടിയിൽ. പത്തായിക്കല്ല് സ്വദേശി സാദിക്ക് ആണ് പിടിയിലായത്. കൊല്ലം സിറ്റി ഡാൻസാഫ് സംഘവും ഈസ്റ്റ് പോലീസും സംയുക്തമായി നടത്തിയ പരിശോധനയിലാണ് പ്രതി പിടിയിലായത്. പ്രതിയിൽ നിന്നും നാലരക്കിലോയോളം തൂക്കം വരുന്ന കഞ്ചാവ് ശേഖരമാണ് കണ്ടെത്തിയത്.

രഹസ്യ വിവരത്തെ തുടർന്ന് നടത്തിയ പരിശോധനയിലാണ് യുവാവിനെ പിടികൂടിയത്. അന്തർ സംസ്ഥാന സർവീസ് നടത്തുന്ന ബസിൽ കഞ്ചാവുമായി കൊല്ലത്ത് എത്തിയ പ്രതിയെ പോലീസ് പിടികൂടുകയായിരുന്നു. ബാഗിനുള്ളിൽ ഒളിപ്പിച്ച നിലയിലായിരുന്നു കഞ്ചാവ്.