തൃശ്ശൂര്‍: ശ്രീകുമാരന്‍ തമ്പിയുടെ കേരള ഗാന വിവാദത്തില്‍ രൂക്ഷമായ വിമര്‍ശനം നേരിട്ടതോടെ പുതിയ ന്യായീകരണവുമായി സാഹിത്യ അക്കാദമി പ്രസിഡന്റ് സച്ചിദാനന്ദന് വീണ്ടും രംഗത്ത്. തമ്പിയോട് കേരളഗാനം ആവശ്യപ്പെട്ടത് സാഹിത്യ അക്കാദമിയോ താനോ അല്ലെന്നാണ് സച്ചിദാനന്ദന്റെ ഇപ്പോഴത്തെ വാദം.
സാംസ്‌കാരിക വകുപ്പാണ് ഗാനം ആവശ്യപ്പെട്ടത്. വകുപ്പ് സെക്രട്ടറി പറഞ്ഞതനുസരിച്ചാണ് സാഹിത്യ അക്കാദമി സെക്രട്ടറി സി.പി. അബൂബക്കര്‍ തമ്പിയെ ബന്ധപ്പെട്ടതും ഗാനം ആവശ്യപ്പെട്ടതും. ഇതുവരെയും ഒരു ഗാനവും സെലക്ട് ചെയ്തിട്ടില്ല. നൂറുകണക്കിന് ഗാനങ്ങള്‍ ലഭിച്ചു. ഇപ്പോഴും ആളുകള്‍ അയച്ചുകൊണ്ടിരിക്കുന്നു. സച്ചിദാനന്ദന് ഇന്നലെ ഫേസ്ബുക്കില്‍ കുറിച്ചു.
നേരത്തെ സച്ചിദാനന്ദന് പറഞ്ഞതിന് കടകവിരുദ്ധമായ നിലപാടാണിത്. ശ്രീകുമാരന്‍ തമ്പിയുടെ ഗാനം ഡോ എം. ലീലാവതി അധ്യക്ഷയായ സ്‌ക്രീനിങ് കമ്മിറ്റി തള്ളി എന്നും പകരം ബി.കെ. ഹരിനാരായണന്റെ ഗാനം സ്വീകരിച്ചു എന്നുമാണ് സച്ചിദാനന്ദന് അന്ന് പറഞ്ഞത്.
വിമര്‍ശനം കടുത്തതോടെയാണ് പുതിയ ന്യായീകരണമെന്നാണ് സൂചന. വിവാദത്തില്‍ സാംസ്‌കാരിക വകുപ്പ് മന്ത്രി സജി ചെറിയാന്‍ സച്ചിദാനന്ദനെ അതൃപ്തി അറിയിച്ചതായും സൂചനയുണ്ട്. തമ്പിയുടെ ഗാനം വേണമോ വേണ്ടയോ എന്ന് തീരുമാനിക്കേണ്ടത് സാംസ്‌കാരിക വകുപ്പാണെന്നും താന്‍ സെലക്ട് കമ്മിറ്റിയിലെ ഒരു അംഗം മാത്രമാണെന്നുമാണ് സച്ചിദാനന്ദന്റെ ഇന്നലത്തെ പോസ്റ്റ്. ഇതോടെ ഉത്തരവാദിത്വം സാംസ്‌കാരിക വകുപ്പിന് മേലാക്കി ഒഴിയാനുള്ള ശ്രമമാണ് സച്ചിദാനന്ദന്റേത്.
ശ്രീകുമാരന്‍ തമ്പിയെ അധിക്ഷേപിച്ചതിനെതിരെ രൂക്ഷമായ പ്രതികരണമാണ് സാംസ്‌കാരിക ലോകത്തു നിന്നും ഉണ്ടായത്. ഡോ. എം. ലീലാവതിയും ഹരിനാരായണനും ഉള്‍പ്പെടെയുള്ളവര്‍ സച്ചിദാനന്ദന്റെ വാദങ്ങള്‍ തള്ളി നേരത്തെ രംഗത്ത് വന്നിരുന്നു.
പ്രതികരിക്കാൻ ഇവിടെ എഴുതുക: