വഡോദര: എട്ടു വര്‍ഷത്തെ വിവാഹ ജീവിതത്തിനിടെ ഭാര്യ സഫ ബെയ്ഗിന്റെ മുഖം പൂര്‍ണമായി കാണുന്ന ചിത്രം ആദ്യമായി പുറത്തുവിട്ട് ഭാരതത്തിന്റെ മുന്‍ ഓള്‍ റൗണ്ട് താരം ഇര്‍ഫാന്‍ പഠാന്‍. ഇരുവരുടെയും എട്ടാം വിവാഹ വാര്‍ഷികമായിരുന്നു കഴിഞ്ഞ ദിവസം. സഫയെക്കുറിച്ച് മനോഹരമായ കുറിപ്പ് പങ്കുവെച്ചുകൊണ്ടാണ് ഇരുവരും ഒന്നിച്ചുള്ള ചിത്രം കൂടെച്ചേര്‍ത്തത്.
‘ഒരാത്മാവുകൊണ്ട് നിര്‍വഹിച്ച നിരവധി റോളുകള്‍, പ്രചോദനമായവള്‍, തമാശക്കാരി, പ്രശ്നക്കാരി, എന്റെ മക്കളുടെ സ്ഥിരം കൂട്ടുകാരി, സുഹൃത്ത്, അമ്മ. മനോഹരമായ ഈ യാത്രയില്‍, നിന്നെ എന്റെ ഭാര്യയായി ഞാന്‍ വിലമതിക്കുന്നു. ആശംസകള്‍ പ്രിയേ’ ഇര്‍ഫാന്‍ എക്‌സില്‍ കുറിച്ചു.
പഠാന്റെയും സഫയുടെയും നിരവധി ചിത്രങ്ങള്‍ പുറത്തുവന്നിരുന്നെങ്കിലും സഫയുടെ മുഖം പൂര്‍ണണായി കാണാനാവുമായിരുന്നില്ല. പാതി മറച്ചതോ മാസ്‌ക് ധരിച്ചതോ മുഖം തിരിച്ചതോ ഇര്‍ഫാനു പിന്നില്‍ നില്‍ക്കുന്നതോ ആയ ചിത്രങ്ങളായിരുന്നു പുറത്തുവിട്ടിരുന്നത്.
സൗദി അറേബ്യയില്‍ ജനിച്ചുവളര്‍ന്ന, മുന്‍ മോഡലായ, സഫ ബെയ്ഗുമായി 2016 ഫെബ്രുവരി നാലിനായിരുന്നു ഇര്‍ഫാന്‍ പത്താന്റെ വിവാഹം. 2014ല്‍ ഇരുവരും പ്രണയത്തിലായിരുന്നു.
വിവാഹത്തിനു പിന്നാലെ സഫ മോഡലിങ് ഉപേക്ഷിച്ചു. പ്രൊഫഷണല്‍ നെയില്‍ ആര്‍ട്ടിസ്റ്റു കൂടിയായ സഫ, സൗദിയിലെ വ്യവസായിയായ മിര്‍ശ ഫാറൂഖിയുടെ മകളാണ്. ഇമ്രാന്‍ ഖാനും സുലൈമാനുമാണ് ഇവരുടെ മക്കള്‍.
പ്രതികരിക്കാൻ ഇവിടെ എഴുതുക: