രഞ്ജി ട്രോഫി : ഛത്തീസ്ഗഡിനെതിരെ കേരളത്തിന് മേല്‍ക്കൈ

റായ്പൂര്‍: രഞ്ജി ട്രോഫിയില്‍ ഛത്തീസ്ഗഡിനെതിരെ കേരളത്തിന് മേല്‍ക്കൈ. റായ്പൂരില്‍ ടോസ് നഷ്ടപ്പെട്ട് ബാറ്റ് ചെയ്ത കേരളം ഒന്നാം ഇന്നിംഗ്സില്‍ 350 റണ്‍സ് നേടി. സച്ചിന്‍ ബേബി (91), മുഹമ്മദ് അസറുദ്ദീന്‍ (85), സഞ്ജു സാംസണ്‍ (57), രോഹന്‍ പ്രേം (54) എന്നിവരുടെ പ്രകടനമാണ് കേരളത്തെ മികച്ച സ്‌കോറിലേക്ക് നയിച്ചത്.

ഛത്തീസ്ഗഡിന് വേണ്ടി ആഷിഷ് ചൗഹാന്‍ അഞ്ച് വിക്കറ്റെടുത്തു.മറുപടി ബാറ്റിംഗ് ആരംഭിച്ച ഛത്തീസ്ഗഡ് രണ്ടാംദിനം കളി അവസാനിക്കുമ്പോള്‍ നാലിന് 100 എന്ന നിലയിലാണ്. കേരത്തിന് വേണ്ടി നിതീഷ് എംഡി രണ്ട് വിക്കറ്റെടുത്തു.ബേസില്‍ തമ്പി, ജലജ് സക്സേന എന്നിവര്‍ ഓരോ വിക്കറ്റ് നേടി.

ഛത്തീസ്ഗഡ് സ്‌കോര്‍ 16 റണ്‍സ് മാത്രമുള്ളപ്പോള്‍ ഓപ്പണര്‍മാരായ ശശാങ്ക് ചന്ദ്രകര്‍ (8), റിഷഭ് തിവാരി (7) എന്നിവരുടെ വിക്കറ്റുകള്‍ നഷ്ടമായി. അഷുതോഷ് സിംഗ് (31) റണ്‍സെടുത്തു. സഖ്യം 75 റണ്‍സ് കൂട്ടിചേര്‍ത്തു. ക്യാപ്റ്റന്‍ അമന്‍ദീപ് ഖാരെ ഡക്കായി. സഞ്ജീത് ദേശായ് 50) റണ്‍സെടുത്തും ഏക്നാഥ് കെര്‍ക്കര്‍ (1) റണ്‍സുമായും ക്രീസിലുണ്ട്.

ഇന്ന് ക്യാപ്റ്റന്‍ സഞ്ജുവിന്റെ വിക്കറ്റാണ് കേരളത്തിന് ആദ്യം നഷ്ടമായത്.തലേദിവസത്തെ സ്‌കോറിനോട് ഒരു റണ്‍ പോലും കൂട്ടിചേര്‍ക്കാതെയാണ് സഞ്ജു മടങ്ങിയത്. പിന്നാലെ വിഷ്ണു വിനോദിനെ (40) ചൗഹാന്‍ ബൗള്‍ഡാക്കി.

ശ്രേയസ് ഗോപാല്‍ (5), ബേസില്‍ തമ്പി (5), നിതീഷ് എം ഡി (5) എന്നിവരും വേഗം മടങ്ങി. എന്നാല്‍ അസറുദ്ദീന്‍ കേരളത്തെ 350ലെത്തിച്ചു. ആദ്യ ദിനം സച്ചിന്‍ ബേബിക്ക് പുറമെ രോഹന്‍ കുന്നുമ്മല്‍ (0), ജലജ് സക്‌സേന (0), രോഹന്‍ പ്രേം (54) എന്നിവരുടെ വിക്കറ്റുകളാണ് കേരളത്തിന് നഷ്ടമായത്.