അടുത്ത മാസം പ്രധാനമന്ത്രി ഒഡീഷയിൽ എത്തുന്നത് രണ്ട് തവണ : ബിജെപിയുടെ ദേശീയ വനിതാ സമ്മേളനത്തിലും അദ്ദേഹം പങ്കെടുക്കും

ഭുവനേശ്വർ: ഒഡീഷ സന്ദർശിക്കാനൊരുങ്ങി പ്രധാനമന്ത്രി നരേന്ദ്ര മോദി. ഫെബ്രുവരി മാസത്തിൽ രണ്ട് തവണ അദ്ദേഹം സന്ദർശനം നടത്തുമെന്ന് ഒഡീഷയിലെ ബിജെപി പാർട്ടി അധ്യക്ഷൻ മൻമോഹൻ സമൽ അറിയിച്ചു.

ഫെബ്രുവരി മൂന്നിന് ഒഡീഷയിലെ സാമ്പൽപൂരിൽ എത്തുന്ന അദ്ദേഹം പൊതുജന റാലിയെ അഭിസംബോധന ചെയ്യും. സാമ്പൽപൂരിൽ നടക്കുന്ന സമ്മേളനത്തിൽ 1.5 ലക്ഷം പേർ പങ്കെടുക്കുമെന്നാണ് കരുതുന്നതെന്ന് സമൽ പറഞ്ഞു. സാമ്പൽപൂരിലെ ഇന്ത്യൻ ഇൻസ്റ്റിറ്റൂട്ട് ഓഫ് മാനേജ്മെൻ്റിൽ നടക്കുന്ന പരിപാടിക്ക് ശേഷമായിരിക്കും അദ്ദേഹം സാമ്പൽപൂരിലേക്ക് തിരിക്കുകയെന്നും അദ്ദേഹം കൂട്ടിച്ചേർത്തു.

തുടർന്ന് ഫെബ്രുവരി 10ന് തലസ്ഥാനമായ ഭുവനേശ്വറിൽ നടക്കുന്ന പാർട്ടിയുടെ ദേശീയ വനിതാ സമ്മേളനത്തിൽ പങ്കെടുത്ത് സംസാരിക്കുമെന്ന് അദ്ദേഹം വ്യക്തമാക്കി. രാജ്യത്ത് ബിജെപിയുടെ നേതൃത്വത്തിൽ രണ്ട് ദേശീയ സമ്മേളനങ്ങളാണ് ഫെബ്രുവരിയിൽ നടത്താൻ പോകുന്നത്. മധ്യ പ്രദേശിലും ഒഡീഷയിലുമാണ് രണ്ട് തീയതികളിൽ സമ്മേളനം നടക്കുക. പതിനാല് സംസ്ഥാനങ്ങളിൽ നിന്നായി 25,000 വനിതകൾ പങ്കെടുക്കുമെന്ന് അദ്ദേഹം പറഞ്ഞു.