തിരുവനന്തപുരം: ഗവർണർ ആരിഫ് മുഹമ്മദ് ഖാന്റെ സുരക്ഷയ്ക്കായി കേന്ദ്ര സേനയെ രാജ്ഭവനിലേക്ക് അയച്ചതിനെതിരെ ഇടതുമുന്നണി കൺവീനർ ഇ.പി ജയരാജൻ. നടപടി ഫെഡറൽ തത്വങ്ങളുടെ ലംഘനമാണെന്നും ജനാധിപത്യ വാദികൾ ശക്തമായി അപലപിക്കണമെന്ന് അദ്ദേഹം ആവശ്യപ്പെട്ടു. കേന്ദ്ര-സംസ്ഥാന ബന്ധങ്ങളുടെ നഗ്നമായ ലംഘനമാണെന്ന് ജയരാജൻ പറഞ്ഞു.
ഇന്ത്യയുടെ ചരിത്രത്തിൽ ഇല്ലാത്ത സംഭവമാണെന്നും കേന്ദ്രസേനയെ രാജ്ഭവനിലേക്ക് അയച്ച നടപടി അപലപനീയമാണെന്നും അതിക്രമമാണെന്നും അദ്ദേഹം പറഞ്ഞു. ‘ഇന്ത്യ ജനാധിപത്യ മതേതരത്വം ഫെഡറല് രാഷ്ട്രമാണ്. ഫെഡറല് തത്വങ്ങളുടെ നഗ്നമായ ലംഘനമാണ് ഇന്നലെ കേന്ദ്രസര്ക്കാര് കാണിച്ചത്. തെരുവില് നിന്നും അഭ്യന്തര മന്ത്രിയെ ഫോണില് വിളിക്കുന്നു. ഉടന് തന്നെ സേനയെ അയക്കുന്നു. സംസ്ഥാന സര്ക്കാരിന്റെ ആവശ്യപ്രകാരമോ സംസ്ഥാന സര്ക്കാര് അറിഞ്ഞുകൊണ്ടോ ആവണം കേന്ദ്ര സേനയെ വിന്യാസിക്കേണ്ടത്. എന്താണ് ഇവിടെ കാണിച്ചുകൂട്ടുന്നത്. കേന്ദ്രത്തിന്റേത് തെറ്റായ നയമാണ്.’ ഇ പി ജയരാജന് പറഞ്ഞു.
കഴിഞ്ഞ ദിവസം കൊല്ലം നിലമേലിൽ പോലീസിനെ നോക്കുകുത്തിയാക്കി കരിങ്കൊടിയുമായി റോഡിലേക്ക് ചാടിയിറങ്ങിയ എസ്എഫ്ഐക്കാർ ഗവർണറുടെ കാ റിന് മുന്നിലേക്ക് പാഞ്ഞടുത്തിരുന്നു. ഇവരെ പോലീസ് തടഞ്ഞില്ല. ഇതേ തുടർന്നാണ് ഗവർണർക്ക് സിആർപിഎഫ് സുരക്ഷ ഏർപ്പെടുത്തിയത്. സർവകലാശാലകൾ കാവിത്കരിക്കുന്നു എന്നാരോപിച്ചാണ് ഗവർണർക്കെതിരെ എസ്എഫ്ഐ പ്രതിഷേധം തുടരുന്നത്.
